Astana Hub Qozog‘iston bozoriga startaplarni tayyorlaydi
Astana Hub va IT Park "Uzbekistan Market Entry" nomli akseleratsiya dasturini ishga tushirdi. Bu haqida Zamin.uz xabar berdi.
Ushbu dastur orqali O‘zbekistonlik startaplar Qozog‘iston bozoriga chiqishda yordam oladi. Arizalar 20 sentyabrga qadar qabul qilinadi.
Market Entry dasturi texnologik startaplar uchun mo‘ljallangan bo‘lib, ularning Qozog‘istonda biznesini kengaytirishiga ko‘maklashadi. Dastur doirasida yuridik shaxs sifatida ro‘yxatdan o‘tish, subsidiyalar va soliq imtiyozlarini olishda yordam beriladi.
Ishtirokchilar mahalliy qonunchilik va soliq tizimiga moslashish, yangi auditoriyada mahsulotlarini sinovdan o‘tkazish hamda pilot loyihalarni tayyorlash imkoniyatiga ega bo‘ladi. Shuningdek, ular ehtimoliy mijozlar va hamkorlar bilan uchrashuvlarda qatnashish imkoniyatiga ega bo‘ladi.
Dastur ishtirokchilariga Astana shahrida ikki nafar jamoa a’zosi uchun ofis va koliving, asosiy sohalardagi mutaxassislar bilan mentorlik sessiyalari, shaxsiy trekerlar bilan ishlash imkoniyati hamda ko‘rgazmalar, forumlar va sohaga oid tadbirlarda qatnashish taklif etiladi. Market Entry dasturining ochilishi 3 oktyabr kuni Digital Bridge xalqaro forumi doirasida bo‘lib o‘tadi.
Mashg‘ulotlar 6 oktyabrdan boshlanib, 8 hafta davom etadi. Akseleratorning yakuniy bosqichi – Demo Day – 5 dekabr kuni tashkil etiladi.
Ushbu tadbirda ishtirokchilar o‘z loyihalarini investorlar va venchur jamg‘armalarga taqdim etish imkoniyatiga ega bo‘ladi. Ma’lumot manbai: Spot.uz.
