O‘zbekistonda 2026 yil bahoridan boshlab pensiyani oldindan hisoblash xizmati ishga tushiriladi. Bu haqida Zamin.uz xabar berdi.
Bu haqda Iqtisodiyot va moliya vazirligi huzuridagi Pensiya jamg‘armasi ijrochi direktori Murodbek Atajonov ma’lum qildi. Hozirda “Moya pensiya” nomli dastur ustida ish olib borilmoqda.
Ushbu dastur pensiya yoshiga yetmagan fuqarolarga kelajakdagi pensiya miqdorini oldindan bilish imkonini yaratadi. Foydalanuvchi o‘zining PINFL raqamini kiritib, OneID tizimi orqali identifikatsiyadan o‘tadi.
So‘ngra uning ish haqi, ish staji, ta’lim davri, ayollar uchun farzandlar soni va erkaklar uchun harbiy xizmat kabi ma’lumotlari 26 ta idoraning axborot tizimlari bilan bog‘lanadi. Shu asosda pensiya miqdori aniq hisoblab chiqiladi.
Dastur shuningdek, yoshga doir pensiya olish uchun zarur bo‘lgan ish staji yetarlimi, degan savolga ham javob beradi. Agar ish staji yetarli bo‘lmasa, dastur norasmiy ish bozoridan chiqib, rasmiy va yuqori maoshli ishga o‘tishga rag‘batlantiradi.
“Moya pensiya” dasturining dastlabki ishga tushirilishi 2026 yil 1 sentyabrga mo‘ljallangan edi, ammo jarayon tezlashtirilib, 2026 yil aprel-may oylarida ishga tushirilishi rejalashtirilmoqda. 1993 yilda qabul qilingan “Fuqarolarning davlat pensiya ta’minoti to‘g‘risida”gi qonunga ko‘ra, erkaklar 60 yoshda, kamida 25 yillik ish staji bilan, ayollar esa 55 yoshda, kamida 20 yillik ish staji bilan pensiyaga chiqish huquqiga ega.
Shuningdek, Prezidentning 2024 yil 26 iyundagi qaroriga muvofiq, 2026 yil 1 dekabrdan boshlab “Moya pensiya” onlayn xizmati fuqarolarning elektron ma’lumotlariga asoslangan holda pensiya miqdorini oldindan hisoblab berishni boshlaydi (manba: Spot.uz).
