“Oila tanlovi” moyi yaroqlilik muddati noto‘g‘ri ko‘rsatildi
O‘zbekiston fuqarolari tomonidan xarid qilingan “Oila tanlovi” savdo belgisi ostidagi kungaboqar moyining yaroqlilik muddati noto‘g‘ri ko‘rsatilgani aniqlanib, iste’molchilarga katta miqdorda kompensatsiya to‘lanadi. Bu haqida Zamin.uz xabar berdi.
Ushbu mahsulot “Uzum” bozori orqali sotilgan va “Bo‘ston Food” kompaniyasi tomonidan ishlab chiqarilgan. Raqobatni rivojlantirish va iste’molchilar huquqlarini himoya qilish qo‘mitasining o‘tkazgan tekshiruvida mahsulotdagi yaroqlilik muddati davlat standartlariga zid ravishda 12 oy deb ko‘rsatilgani ma’lum bo‘ldi.
Aslida, GOST 1129–2013 standartiga ko‘ra, bu turdagi yog‘ faqat 6 oy davomida saqlanishi mumkin. Bundan tashqari, yorliqda texnik reglament — O‘zTR No 724 ko‘rsatilmaganligi aniqlangan.
Qo‘mita bu holatni “Iste’molchilar huquqlarini himoya qilish to‘g‘risida”gi qonunning 6-moddasining buzilishi sifatida baholadi. Maxsus komissiya ikki kompaniyaga quyidagi talablarni bajarishni majburiy etdi: 145 ming dona shishada sotilgan mahsulotni qaytarib olib, xaridorlarga jami 1,6 milliard so‘m miqdorida kompensatsiya to‘lash yoki mahsulotni sifatli nusxasi bilan almashtirish.
Agar xaridorlarni aniqlash imkoni bo‘lmasa, kompensatsiya summasi davlat byudjetiga o‘tkaziladi. “Uzum Market” va “Bo‘ston Food Company” ushbu qarorga norozi bo‘lib sudga murojaat qilgan, ammo sud ularning da’volarini rad etdi va qo‘mita qarorini kuchda qoldirdi.
Mutaxassislar bu holatni iste’molchilar huquqlarini himoya qilishda muhim saboq deb hisoblamoqda. (Manba: zamin.uz)
