Mirziyoyev aholi va qishloq xo‘jaligini ro‘yxatga oladi
Prezident Shavkat Mirziyoyev 11 sentyabr kuni aholi va qishloq xo‘jaligini ro‘yxatga olish jarayonlarini samarali tashkil etish bo‘yicha takliflar taqdimoti bilan tanishdi. Bu haqida Zamin.uz xabar berdi.
Mamlakatning uzoq muddatli rivojlanish strategiyasida aholining demografik hamda ijtimoiy-iqtisodiy ko‘rsatkichlari, yashash sharoiti va farovonlik darajasi, shuningdek qishloq xo‘jaligi holati aniq ma’lumotlar asosida baholanadi. Shu sababli, ro‘yxatga olish jarayonlari asosiy ustuvor vazifa sifatida belgilangan.
So‘nggi umummilliy ro‘yxatga olish 1989 yilda o‘tkazilgan. Keyinchalik bu sohada muhim islohotlar amalga oshirildi.
Xususan, “Aholini ro‘yxatga olish to‘g‘risida” qonun qabul qilindi, unga ko‘ra aholi har o‘n yilda, qishloq xo‘jaligi esa kamida har besh yilda ro‘yxatga olinishi belgilandi. 2021 yilda aholi, 2022 yilda esa agrar sohada sinov ro‘yxati o‘tkazildi, biroq to‘liq qamrovli tadbir uchun zarur shart-sharoitlar va xalqaro tajriba o‘rganilishi sabab jarayon keyinga qoldirildi.
Yangi taklif Jahon banki, BMTning Aholini rejalashtirish bo‘yicha fondi (YUNFPA) va Oziq-ovqat va qishloq xo‘jaligi tashkiloti (FAO) ko‘magida ishlab chiqildi. Unda aholi va qishloq xo‘jaligini hisobga olish 2026 yil 15 yanvardan 28 fevralga qadar o‘tkazilishi belgilangan.
Dastlabki 17 kun internet orqali, keyingi bir oy davomida esa mahalla yettiliklari yordamida uyma-uy yurib amalga oshiriladi. Bu usul xarajatlarni sezilarli darajada kamaytirib, taxminan 1,3 trillion so‘m tejash imkonini beradi.
Jarayonlar sodda va shaffof bo‘lib, savollar soni oldingi 328 tadan 71 taga qisqartirildi. Natijada, Yevropa statistiklar konferensiyasi tavsiyalariga muvofiq, mamlakat aholisi haqida yagona, to‘liq va ishonchli ma’lumotlar bazasi yaratiladi.
Ushbu ma’lumotlar tarkibiga aholi soni va tuzilishi, migratsiya jarayonlari, oilaviy holat, daromad manbalari va faoliyat turlari kiradi. Qishloq xo‘jaligi sohasida esa yer maydonlaridan foydalanish, chorva va parranda soni haqidagi aniq ma’lumotlar yig‘iladi.
Bu ma’lumotlar qishloq xo‘jaligiga yo‘naltirilgan 25,6 trillion so‘mlik mablag‘, jumladan 2,2 trillion so‘m davlat budjeti resurslarini samarali ishlatish, oziq-ovqat xavfsizligini ta’minlashda muhim ahamiyat kasb etadi. Jarayonlarni muvaffaqiyatli tashkil etish uchun mahalla yettiliklari maxsus o‘quv dasturlari asosida tayyorlanadi va rag‘batlantiriladi.
Loyihaning moliyaviy ta’minoti Jahon banki tomonidan amalga oshiriladi. Shuningdek, ommaviy axborot vositalari va ijtimoiy tarmoqlar orqali keng targ‘ibot ishlari olib borilib, aholiga yetarli darajada ma’lumot beriladi.
Prezident Shavkat Mirziyoyev ushbu rejani ma’qullab, aholi hamda qishloq xo‘jaligini ro‘yxatga olish tadbirlarini tizimli, sifatli va samarali amalga oshirish bo‘yicha aniq ko‘rsatmalar berdi. Ma’lumotlar manbai: zamin.uz.
