O‘zbekistondan Buyuk Britaniyaga yangi qishloq xo‘jaligi mahsulotlari yetkazib berildi. Bu haqida Zamin.uz xabar berdi.
Exim Dried Fruits Imporve Group korxonasi tomonidan Londonda faoliyat yuritayotgan Baykoos Foods Ltd kompaniyasiga 2 tonnadan ortiq qovun va uzum taqdim etildi. So‘nggi yillarda o‘zbek mahsulotlari Britaniya bozorida o‘z o‘rnini topib, xaridorlar orasida yuqori sifat va mazasi bilan alohida e’tirof etilmoqda.
2025-yilning birinchi yarmida O‘zbekistondan Buyuk Britaniyaga qishloq xo‘jaligi mahsulotlari eksporti ikki barobarga oshgani qayd etildi. Bu yutuqqa Londonda iyun oyida o‘tkazilgan «O‘zbekiston mahsulotlari» savdo ko‘rgazmasi katta hissa qo‘shdi.
Tadbirda 20 dan ortiq yirik eksportyor kompaniyalar ishtirok etib, Londonning ulgurji bozorlari hamda meva-sabzavot importi bilan shug‘ullanuvchi omborlar faoliyati bilan yaqindan tanishdi. Shu bilan birga, britaniyalik yirik kompaniyalar bilan dastlabki kelishuvlar amalga oshirildi.
Hozirda O‘zbekistondan Buyuk Britaniyaga 30 dan ortiq turdagi qishloq xo‘jaligi mahsulotlari yetkazib berilmoqda. Bu ikki mamlakat o‘rtasidagi savdo aloqalari kuchayib borayotganidan dalolat beradi.
Yaqin kelajakda britaniyalik iste’molchilar stollarida o‘zbek mahsulotlarining soni yanada ko‘payishi kutilmoqda. Manba: zamin.uz
