Namangan viloyatida tarixiy va madaniy merosni o‘rganishda muhim yangiliklar kuzatildi. Bu haqida Zamin.uz xabar berdi.
Viloyat hokimligi matbuot xizmati xabariga ko‘ra, VIII asrga oid noyob qo‘lyozma hamda Abbosiylar davrida zarb qilingan tangalar topildi. Axsikent arxeologiya parkidagi Yangi Axsi majmuasi fondlari 68 ta yangi tanga va 27 ta qo‘lyozma bilan boyidi.
Arxeologlar ma’lumotiga ko‘ra, Abbosiylar hukmronligi davriga oid kumush tangalar o‘ziga xos arab yozuvlari va bezaklari bilan ajralib turadi. Topilgan qo‘lyozma ilm-fanning turli sohalariga, jumladan handasa, riyoziyot, astronomiya va tibbiyotga oid qimmatli ma’lumotlarni o‘z ichiga oladi.
Bu asar o‘sha davrdagi ilm-fan darajasini ko‘rsatadigan muhim manba hisoblanadi. Bundan tashqari, topilmalar orasida Somoniylar va Qoraxoniylar davriga tegishli tangalar ham borligi aniqlandi.
Shuningdek, 1667–1670 yillarda Shvetsiyada va 1836 yilda Buyuk Britaniyada chiqarilgan tangalar ham topildi. Mutaxassislarning fikricha, ilk kumush tangalar miloddan avvalgi III asrga taalluqlidir.
Ularning aversida podsholarning surati, teskari tomonida esa turli xudolar, muqaddas hayvonlar yoki hukmdorlarning nom va tamg‘alari tasvirlangan. Hozirda qazishma ishlari davom etmoqda va arxeologlar topilmalar nafaqat mahalliy, balki xalqaro ilmiy hamjamiyat uchun ham katta ahamiyatga ega ekanini ta’kidlashmoqda.
Manba: zamin.uz
👍 0❤️ 0😂 0😢 0😡 0
