Tibbiyotda faol qizlar uchun “Zulfiya” mukofoti joriy etiladi
O‘zbekistonda xotin-qizlarni qo‘llab-quvvatlash va ularning turli sohalardagi faolligini oshirish maqsadida yangi taklif muhokama qilinmoqda. Bu haqida Zamin.uz xabar berdi.
Prezident farmoni loyihasiga ko‘ra, tibbiyot yo‘nalishida alohida “Zulfiya” nomli davlat mukofoti joriy etilishi rejalashtirilmoqda. Mazkur o‘zgarishlar PF-2326-sonli Farmonga kiritilishi ko‘zda tutilgan.
Ushbu mukofot 14 yoshdan 30 yoshgacha bo‘lgan iqtidorli xotin-qizlarni rag‘batlantirishga qaratilgan bo‘lib, tibbiyot sohasida yutuqlarga erishgan, ilmiy izlanishlar olib borgan yoki jamoatchilikka munosib hissa qo‘shgan shaxslarga beriladi. Nomzodlardan so‘nggi uch yil ichida tibbiyotda amalga oshirgan ishlari, ilmiy maqolalari, patentlari yoki jamoatchilik faoliyatidagi yutuqlarini tasdiqlovchi rasmiy hujjatlar talab etiladi.
Mutaxassislar fikricha, mazkur tashabbus tibbiyot yo‘nalishida faoliyat yuritayotgan qizlarni yanada ko‘proq rag‘batlantiradi. Bu nafaqat ularning shaxsiy salohiyatini rivojlantirishga xizmat qiladi, balki mamlakat sog‘liqni saqlash tizimidagi ilmiy va amaliy ishlanmalarni ham kuchaytiradi.
Shuningdek, Oila va xotin-qizlar qo‘mitasiga uch oy muddatda qonunchilikka tegishli o‘zgartirish va qo‘shimchalar kiritish bo‘yicha taklif tayyorlab, Hukumatga taqdim etish vazifasi yuklatilgan. “Zulfiya” mukofoti ilgari ta’lim, san’at va ijtimoiy sohada faoliyat yuritayotgan iqtidorli qizlarni rag‘batlantirib kelgan bo‘lsa, endilikda tibbiyot sohasida ham xotin-qizlarning faolligini kengaytirishga yordam beradi (manba: zamin.uz).
