O‘zbekiston va Malayziya IT sohasida hamkorlik qiladi
O‘zbekistonning Malayziyadagi elchisi Karomiddin Gadoyev mamlakatning yirik IT kompaniyalaridan biri bo‘lgan Basis Bay kompaniyasi asoschisi va direktorlar kengashi ijrochi raisi Praba Txiagarajax bilan uchrashuv o‘tkazdi. Bu haqda Zamin.uz xabar berdi.
Uchrashuvda raqamli texnologiyalar sohasida hamkorlik imkoniyatlari va istiqbollari muhokama qilindi. Praba Txiagarajax kompaniyasi Malayziyada yagona milliy rezidentlik asosida tashkil etilgan ma’lumotlar markazini barpo etganini ta’kidladi.
Shuningdek, ular 2009-yildan boshlab Osiyo mintaqasida ekologik jihatdan toza va energiya tejamkor “yashil” ma’lumotlar markazi faoliyatini yo‘lga qo‘ygan. Uchrashuvda O‘zbekistonning raqamli iqtisodiyotni rivojlantirish borasidagi sa’y-harakatlari, qulay geografik joylashuvi va salohiyati hisobga olinib, mamlakatda yangi data markaz qurish va bu sohada sarmoya kiritish imkoniyatlari muhokama qilindi.
Praba Txiagarajax yaqin kunlarda mutaxassislar ishtirokidagi ishchi guruhni Toshkentga yuborishni rejalashtirayotganini bildirdi. Basis Bay kompaniyasi 1996-yilda tashkil etilgan bo‘lib, Malayziyada axborot texnologiyalari sohasida yetakchi o‘rinlardan birini egallaydi.
Kompaniyaning asosiy faoliyati ma’lumotlar markazlari va bulutli xizmatlarni taqdim etishga qaratilgan. Hozirda ular Kuala-Lumpur va uning atrofida to‘rtta yirik data markazini boshqaradi.
Manba: Dunyo axborot agentligi.
