Ekologiya vazirligi matbuot xizmati ma’lumotiga ko‘ra, 2025-yilning dastlabki sakkiz oyida Toshkent shahrida atmosfera havosining sifatini yaxshilash va havoni sog‘lom saqlash maqsadida bir qator samarali chora-tadbirlar amalga oshirildi. Bu haqda Zamin.uz xabar berdi.
Yanvardan avgustgacha bo‘lgan davrda 1452 ta obyekt tekshiruvdan o‘tkazilib, 174 ta tungi reyd tadbirlari tashkil etildi. Ushbu tekshiruvlar davomida 281 ta qonun buzilish holati aniqlanib, 154 nafar shaxsga ma’muriy bayonnoma berildi.
Shuningdek, 20 ta korxona faoliyati vaqtincha to‘xtatish uchun sudga murojaat qilindi va 179 ta qonun buzilishi bartaraf etildi. Bu davrda 11 ta zamonaviy qozon uskunasi, 19 ta samarali filtr hamda 12 ta changni tozalash apparatlari o‘rnatildi.
Ushbu chora-tadbirlar korxonalarning atrof-muhitga salbiy ta’sirini kamaytirishga hamda hududlarda havo sifatini yaxshilashga qaratilgan. Bundan tashqari, 2025-yilda yirik qurilish materiallari ishlab chiqaruvchi va boshqa 1-2 toifa korxonalar tomonidan 200 ming tup daraxt va buta ko‘chatlari ekilishi rejalashtirilgan.
Bu ishlar nafaqat shaharni yashillashtirish, balki ekologik barqarorlikni ta’minlashga xizmat qiladi. Har yili ikki bosqichda o‘tkaziladigan “Toza havo” oyligining birinchi bosqichida, ya’ni 10 aprel va 10 may kunlari orasida Toshkent shahrida 40 050 ta avtotransport vositasi tekshirildi.
Tekshiruv natijasida 586 ta transport vositasida atmosferaga chiqarilayotgan zararli gazlar miqdori me’yordan oshgani aniqlanib, belgilangan tartibda kamchiliklar bartaraf etildi. Ushbu choralar natijasida atmosferaga 4,7 ming tonna zararli chiqindilarning tarqalishi oldi olindi.
Manba: ekologiya vazirligi matbuot xizmati.
👍 0❤️ 0😂 0😢 0😡 0
