Bolalar internetdan asosan ta’lim uchun foydalanadi

XXI asrda internet nafaqat kattalar, balki bolalar hayotining ajralmas qismiga aylangan. Bu haqda Zamin.uz xabar berdi.

“Yuksalish” harakati tomonidan o‘tkazilgan so‘rovnoma natijalariga ko‘ra, bolalarning ko‘pchiligi internetda me’yoridan ortiq vaqt o‘tkazmaydi. So‘rovda qatnashgan bolalarning 36 foizi kuniga bir soatgacha, 31 foizi esa birdan uch soatgacha internetda bo‘ladi.

Shuningdek, 11 foizi to‘rtdan olti soatgacha, 7 foizi esa oltidan ortiq soat vaqtini internetda sarflaydi. Internetdan foydalanishning asosiy maqsadi ta’lim olish bo‘lib, bolalarning 64 foizi o‘qish uchun internetga kirishini ta’kidlagan.

Bundan tashqari, videolar tomosha qilish 16 foiz, o‘yin o‘ynash va ijtimoiy tarmoqlardan foydalanish esa taxminan 12 foiz atrofida qayd etilgan. Ota-onalarning 10 foizi esa bolalariga xalaqit bermaslik maqsadida telefon berishini ma’lum qilgan.

Internet bilan bog‘liq muammolar sifatida ota-onalar ko‘proq vaqtni bekorga o‘tkazish (35 foiz), sog‘liqqa salbiy ta’sir va uyqu buzilishi (30 foiz), shuningdek internetga qaramlik va nomaqbul mazmunlar (14 foiz)ni ko‘rsatishgan. Shu bilan birga, so‘rovda qatnashganlarning 25 foizi farzandlarida hech qanday muammo kuzatilmaganligini bildirgan.

Ma’lumotlar Uz24.uz saytidan olindi.