O‘zbekistonda hayvonlarga nisbatan shafqatsiz munosabatga qarshi kurash yanada kuchaymoqda. Bu haqda Zamin.uz xabar berdi.
Oliy sud ma’lumotlariga ko‘ra, joriy yilning birinchi yarmida hayvonlarga nisbatan shafqatsizlik qilgan 34 nafar shaxs javobgarlikka tortilgan. Ulardan 32 nafari jarima bilan jazolangan, ikki kishi esa 15 sutkagacha ma’muriy qamoq jazosi olgan.
Sud matbuot kotibi ta’kidicha, hayvonlarni qasddan qiynash, ularga azob berish yoki ularning o‘limiga sababchi bo‘lish holatlariga nisbatan jazo choralari qat’iy belgilangan. 2020 yildan 2024 yilgacha bo‘lgan davrda Ma’muriy javobgarlik to‘g‘risidagi kodeksning 111-moddasi asosida jami 397 kishi javobgarlikka tortilgan.
Ularning 363 nafari jarima to‘lagan, 34 nafari esa ma’muriy qamoq jazosini o‘tagan. Qonunchilikka muvofiq, hayvonlarga nisbatan shafqatsizlik uchun nafaqat jarima, balki qamoq jazosi ham qo‘llaniladi.
Agar bu kabi huquqbuzarliklar takrorlansa, jazo og‘irlashtiriladi. Shu bilan birga, 2021 yildan Jinoyat kodeksiga ham hayvonlarga qarshi shafqatsizlik uchun alohida modda kiritilgan.
Oliy sudning fikricha, bu choralar nafaqat hayvonlarni himoya qilish, balki jamiyatda insonparvarlik va mas’uliyat tuyg‘usini mustahkamlash uchun muhimdir. Mutaxassislar jonzotlarga shafqatsizlik qilgan odamlar jamiyat xavfsizligiga tahdid solishini ta’kidlaydi.
Misol uchun, Buxoroda tor qafasda saqlangan ayiq haqida jamoatchilikda keng muhokamalar bo‘lib, tanqidlardan so‘ng hayvon kattaroq maydonga ko‘chirilgan. Faollar aytishicha, ayiq 10 kundan ortiq noqulay sharoitda yashashga majbur bo‘lgan.
Mutasaddilar bu holat hayvonlarga insoniy munosabat qilish masalasining jamiyatda qanchalik dolzarb ekanligini yana bir bor ko‘rsatganini bildiradi. Ma’lumotlar Oliy sud matbuot xizmatidan olindi.
