Toshkent shahrida jamoat transportida yo‘l haqini to‘lamay harakat qilgan yo‘lovchilarga nisbatan qat’iy choralar ko‘rilmoqda. Bu haqda Zamin.uz xabar berdi.
Transport vazirligi ma’lumotlariga ko‘ra, yil boshidan buyon poytaxtda 6 mingdan ortiq qoidabuzar yo‘lovchi jarimaga tortilgan. Rasmiy ma’lumotlarga ko‘ra, Transport nazorati inspeksiyasi hamda Toshkent shahar jamoat transportini monitoring va nazorat qilish muassasasi xodimlari muntazam ravishda avtobuslarda tekshiruvlar o‘tkazmoqda.
Ushbu reydlar davomida 6182 nafar yo‘lovchi yo‘l haqini to‘lamay safar qilgani uchun javobgarlikka tortilgan. Ma’muriy javobgarlik to‘g‘risidagi kodeksning 144-moddasiga muvofiq, shahar ichidagi va atrofdagi avtobuslarda chiptasiz yurish bazaviy hisoblash miqdorining o‘ndan bir qismi miqdorida jarima solinishiga sabab bo‘ladi.
Mutasaddilar ta’kidicha, reydlarning asosiy maqsadi fuqarolarning qonunga rioya etishini ta’minlash va jamoat transportida adolatli tartibni saqlashdir. Har bir yo‘lovchining chipta uchun to‘lov qilishi nafaqat tizimning barqaror ishlashini, balki xizmat sifatining yaxshilanishini ham ta’minlaydi.
Statistik ma’lumotlarga ko‘ra, joriy yil yanvar oyida ATTO transport va virtual kartalari orqali jami 15,2 million to‘lov amalga oshirilgan. Shundan 11,7 millioni avtobuslarda, 3,5 millioni esa metropolitenda ro‘yxatdan o‘tgan.
Bu orqali yo‘lovchilar o‘tgan oy davomida tariflar orqali taxminan 3,2 milliard so‘mni tejashga erishgan. Mutaxassislar fikricha, chiptasiz harakat qilish nafaqat qonunbuzarlik, balki jamoat transporti tizimiga jiddiy zarar yetkazadi.
Shu sababli aholiga qoidalarga qat’iy rioya qilish, elektron kartalardan foydalanish va to‘lovlarni o‘z vaqtida amalga oshirish tavsiya etiladi (manba: zamin.uz).
