Operatorlarga internetga to‘g‘ridan-to‘g‘ri ulanish huquqi berildi
O‘zbekistonda mobil aloqa operatorlari internetga vositachilarsiz to‘g‘ridan-to‘g‘ri ulanish imkoniyatiga ega bo‘ladi. Bu haqda Zamin.uz xabar berdi.
Ushbu yangilik hukumat qarori asosida tasdiqlandi. Operatorlarga 2030-yil 1-yanvargacha tajriba tariqasida xalqaro internet tarmoqlariga bevosita ulanish huquqi berildi.
Bu huquq tijorat faoliyati va foydalanuvchilarga xizmat ko‘rsatish maqsadida qo‘llaniladi. Raqamli texnologiyalar vazirligi ma’lumotiga ko‘ra, ushbu qaror telekommunikatsiya bozoriga investitsiyalarni jalb qilish, axborot xavfsizligini ta’minlash hamda O‘zbekiston qonunchiligini Jahon savdo tashkiloti talablariga moslashtirish uchun qabul qilindi.
Shu tariqa, mamlakatda internet infratuzilmasini rivojlantirish va raqamli iqtisodiyotni yanada mustahkamlashga qaratilgan muhim qadam tashlandi. Bu o‘z navbatida xizmat sifatini oshirish va raqobatni kuchaytirishga xizmat qiladi.
Manba: Kursiv.media.
