Kiyevda noqonuniy qullikda ushlanganlar ozod qilindi
Kiyev viloyatida odamlarni noqonuniy ekspluatatsiya qilgan guruh fosh etildi. Bu haqda Zamin.uz xabar berdi.
Ukraina prokuraturasi ma’lumotlariga ko‘ra, jinoyatchilar orasida Xitoyning ikki fuqarosi, bir o‘zbekistonlik hamda bir ukrainalik ayol bor. Ular qo‘lga olingan va hozirda ularga nisbatan ehtiyot chorasi belgilanmoqda.
Tergov jarayonida aniqlanishicha, gumonlanuvchilar uy-joysiz va qiyin moddiy sharoitda yashovchi shaxslarni aldab, majburlash orqali qullikka jalb qilgan. Ushbu insonlar qattiq nazorat ostida saqlangan, mehnatga majburlangan hamda harakat erkinliklari cheklangan.
Ularga nisbatan haddan tashqari kamsitishlar qo‘llanilgan, hatto hojatxonaga chiqish uchun ruxsat so‘rash talab qilingan, kichik qoidabuzarliklar uchun esa jarimalar belgilangan. Huquq-tartibot organlari jinoyatchilar yashagan uy va xo‘jalik obyektlarini aniqlab, g‘ayriinsoniy sharoitda saqlangan 13 nafar O‘zbekiston fuqarosini ozod etdi.
Ushbu holat odamlarni noqonuniy qullikka jalb qilish va ekspluatatsiyaga qarshi kurashdagi muhim qadam hisoblanadi. Ma’lumotlar zamin.uz saytidan olindi.
