2025 yil 20 sentyabr kuni soat 13:00 larda Toshkent viloyati Bo‘stonliq tumani Yakatut qishlog‘iga tutash hududda joylashgan Burchmulla davlat o‘rmon xo‘jaligida yong‘in yuz berdi. Bu haqda Zamin.uz xabar berdi.
Yong‘in haqida xabar kelishi bilan o‘rmon xo‘jaligi mas’ullari, 40 nafardan ortiq ishchi-xodimlar, shuningdek, mahalliy yoshlardan tashkil topgan 10 kishilik ko‘ngilli yong‘in-qutqaruv guruhi va tuman ichki ishlar bo‘limi xodimlari hodisa joyiga yetib bordi. Ularning tezkor va hamjihat harakatlari tufayli yong‘in soat 14:40 ga kelib butunlay bartaraf etildi.
Ma’lumotlarga ko‘ra, yong‘in natijasida taxminan 1,5 gektar maydondagi qurib qolgan o‘tlar yonib ketgan. Yong‘inning kelib chiqish sababi sifatida Yakatut qishlog‘ida yashovchi, 1956 yilda tug‘ilgan S.D.
ismli fuqaroning ichimlik suvi metall quvurini payvandlash jarayonida texnika xavfsizligi qoidalariga rioya qilmasligi ko‘rsatilmoqda. Shu sababli S.D.ga nisbatan O‘zbekiston Respublikasi Ma’muriy javobgarlik to‘g‘risidagi kodeksning 84-moddasi 3-qismi asosida ma’muriy bayonnoma rasmiylashtirildi.
Mazkur voqea yuzasidan zaruriy profilaktik choralar ko‘rilmoqda va fuqarolardan o‘rmon hududlarida xavfsizlik qoidalariga qat’iy rioya qilishlari so‘ralmoqda. Manba: zamin.uz
