22 sentyabrda kuchli magnit bo‘roni kutilmoqda
22 sentyabr kuni O‘zbekiston hududida kuchli magnit bo‘roni kuzatilishi kutilmoqda. Bu haqda Zamin.uz xabar berdi.
Meteonova portalining ma’lumotlariga ko‘ra, ushbu kunda geomagnit faollik “to‘q sariq” xavf darajasida bo‘ladi. Bu holat ayniqsa yurak-qon tomir kasalliklari, asab tizimi muammolari, qandli diabet hamda bronxial astmaga chalingan bemorlar uchun og‘ir kechishi mumkin.
Shuningdek, ob-havo o‘zgarishlariga sezgir va meteopatiyadan aziyat chekadigan odamlar ham o‘z sog‘lig‘iga alohida e’tibor berishlari zarur. Magnit bo‘ronining eng yuqori darajasi ertalab soat 5:00 da kuzatiladi va ta’siri kun davomida, taxminan soat 14:00 gacha davom etadi.
Bu vaqt ichida bosh og‘rig‘i, yurakda noqulaylik, uyqusizlik va ruhiy bezovtalik holatlari yuzaga kelishi mumkin. Shifokorlar bunday kunlarda suyuqlik iste’mol qilishni ko‘paytirishni, stressdan saqlanishni hamda yetarli darajada dam olishni tavsiya qilmoqda.
Agar sog‘likda jiddiy o‘zgarishlar sezilsa, darhol tibbiy yordamga murojaat qilish muhimdir. Magnit bo‘ronlari nafaqat inson salomatligiga, balki texnika vositalari va aloqa tizimlariga ham salbiy ta’sir ko‘rsatishi mumkin.
Shu sababli mutaxassislar har qanday holatda ehtiyotkor bo‘lishni maslahat bermoqda. Ushbu ma’lumotlar Meteonova portali asosida tayyorlandi.
