O‘zbekistonda to‘y va boshqa oilaviy marosimlar o‘tkazilish tartibi ustidan qat’iy nazorat joriy etiladi. Bu haqda Zamin.uz xabar berdi.
Endilikda oilaviy tadbirlarda 200 nafardan, osh berish marosimlarida esa 250 nafardan ortiq mehmon qatnashishi mumkin emas. Ushbu me’yor barcha uchun bir xil qo‘llanadi va uning bajarilishini nazorat organlari doimiy ravishda kuzatib boradi.
2026–2030-yillar “Dolzarb oziq-ovqat xavfsizligi davri” deb e’lon qilingan bo‘lib, ushbu davrda “Oqilona iste’mol” dasturi amalga oshiriladi. Bu tashabbus orqali ortiqcha isrofgarchilikka chek qo‘yish, xo‘jalik yuritishda tejamkorlikni oshirish hamda tantanalarda sarf-xarajatlarni kamaytirish maqsad qilingan.
Shu munosabat bilan 2025-yil 16-sentyabrda qabul qilingan 589-son qarorda tegishli tartib-taomillar batafsil belgilab berildi. Qarorga muvofiq, to‘ylar, ma’raka va boshqa oilaviy tadbirlar 2019-yilda qabul qilingan qo‘shma qaror talablariga muvofiq qat’iy tartibda o‘tkaziladi.
Xususan, oilaviy tadbirlarda 200 nafargacha, osh berish marosimlarida esa 250 nafargacha odam qatnashishi aniq belgilangan. Qo‘shaloq to‘y-hashamlarda ham 250 nafardan ortiq mehmon qatnashishiga ruxsat berilmaydi.
Shuningdek, milliy qadriyatlarimizga yot bo‘lgan va ortiqcha dabdababozlikka olib keladigan ayrim rasm-rusumlar hamda shou-tadbirlar qat’iy cheklanadi. Masalan, “kuyov navkari”, “chorlar”, “ota ko‘rdi”, “sep yoydi”, “kuda chaqirdi” kabi marosimlar, shuningdek motam tadbirlaridagi “yetti”, “qirq”, “yil oshi” kabi qo‘shimcha urf-odatlar bekor qilinadi.
Bu chora-tadbirlar tantanalarning mazmun-mohiyatini asrab qolish, ortiqcha dabdabani yo‘qotish va sarf-xarajatlarni maqsadga muvofiq qilishga xizmat qiladi. Dastur asosida har bir tadbir o‘lchovli va me’yoriy asosda tashkil etiladi.
Mehmonlar soni chegaralanib, taomlar miqdori oqilona belgilansa, xizmatlar tejamkor tarzda rejalashtiriladi. Natijada mablag‘ tejaladi, ijtimoiy mas’uliyat oshadi, isrof kamayadi va oilalarning moliyaviy yuklamasi yengillashadi.
Prezidentning 2025-yil aprel oyidagi farmonida ushbu tartiblarni yanada takomillashtirish uchun mexanizmlar ishlab chiqish vazifasi qo‘yilgan. Avgust oyida Oliy Majlis palatalari kengashlarining qo‘shma qarori loyihasi tayyorlandi.
Unda yoshlar o‘rtasida tejamkorlik va oqilona iste’mol madaniyatini shakllantirishga qaratilgan yangi qoidalar ham kiritilgan. Ushbu hujjatlar joriy etilgach, tantanalarda me’yoriylik, sarf-xarajatda muvofiqlik va ma’naviy tarbiya masalalari yanada mustahkamlanadi (manba: zamin.uz).
