Issiq suv va isitish uchun to‘lovlar alohida bo‘ladi
Poytaxt aholisi uchun muhim yangilik: endilikda issiq suv va isitish xizmatlari uchun to‘lovlar alohida hisoblanadi. Bu haqda Zamin.uz xabar berdi.
Bu haqda “Veolia Energy Tashkent” kompaniyasi rasmiy sayti orqali ma’lum qildi. Kompaniyaning shaxsiy kabinetida yangi imkoniyat yaratildi.
Endi to‘lovlar ikki turga ajratiladi: issiq suv ta’minoti va isitish xizmati uchun. Bu tartib hisob-kitoblarni yanada tushunarli qiladi hamda iste’molchilarga o‘z savollarini aniq berish imkonini beradi.
Yangi funksiyadan foydalanish uchun cabinet.veoliaenergy.uz sayti orqali shaxsiy kabinetga kirib, “Hisob-kitoblar” bo‘limida kerakli davrni tanlab, “Sharhlash” tugmasini bosish zarur. Agar hisob-kitobda noaniqliklar yoki xizmat sifatini yaxshilash bo‘yicha takliflar bo‘lsa, Telegramdagi maxsus guruhga, [email protected] elektron pochtasiga yoki tuman issiqlik ta’minoti bo‘limlariga murojaat qilish mumkin.
Shuningdek, 2025 yil 22 avgustda Toshkent shahar kengashi issiq suv va isitish xizmatlari uchun yangi tariflarni ma’qulladi. Aholi uchun chakana tarif 15 foizga oshdi va QQSsiz 121 617 so‘mdan 139 860 so‘mga yetdi.
Yuridik shaxslar uchun tarif 40 foizga o‘sib, 244 497 so‘mdan 342 296 so‘mga ko‘tarildi. Bazaviy tarif esa 7 foizga oshirib, 711 641 so‘mga belgilandi.
Budjet tashkilotlari uchun esa tarif o‘sishi 18,8 foizni tashkil etdi. “Veolia Energy Tashkent” bosh direktori Sevara Pardayeva ta’kidlaganidek, hozirda poytaxt aholisi bazaviy tarifning faqat 18 foizini to‘laydi, qolgan qismi shahar budjeti tomonidan subsidiya qilinadi.
Biroq hukumat 2030 yilgacha bu subsidiyalarni bosqichma-bosqich bekor qilib, to‘lovlarni to‘liq iste’molchilar zimmasiga o‘tkazishni rejalashtirmoqda. Kompaniya kelgusi besh yil ichida aholini xizmat haqini to‘liq qoplash darajasiga yetkazishni maqsad qilgan (manba: veoliaenergy.uz).
