Toshkentda havoning ifloslanishi xavfli darajada oshdi
Toshkent shahri hozirda dunyoda eng iflos shaharlar qatorida birinchi o‘rinni egallamoqda. Bu haqda Zamin.uz xabar berdi.
Shahar havosining ifloslanish darajasi nafas olish uchun xavfli bo‘lib, ayniqsa Uchtepa va Olmazor tumanlarida bu ko‘rsatkich yuqori darajada. Mutaxassislar aholiga tashqarida vaqtni imkon qadar kamaytirishni, derazalarni yopiq holda saqlashni va tashqariga chiqqanda niqob yoki respirator taqishni tavsiya qilmoqda.
Shu bilan birga, haftaning boshida yuzaga kelgan magnit bo‘ronlari bosh og‘rig‘i, qon bosimining oshishi va holsizlik kabi noqulayliklarga sabab bo‘lishi mumkin. Qarshi shahrida ham havodagi PM2.5 zarrachalari milliy normalardan ikki-uch barobar oshgani qayd etildi.
Havodagi ifloslanish faqat transport va sanoat tarmoqlari bilan bog‘liq emas, balki qurilish materiallari ishlatilishi, daraxtlarning kesilishi hamda yashil maydonlarning kamayishi ham muhim omillardandir. Bu holat shahar ekologiyasi va aholining sog‘lig‘iga salbiy ta’sir ko‘rsatmoqda.
Manba: zamin.uz
