Shavkat Mirziyoyev 22-sentyabr kuni Nyu York shahrida Xalqaro valyuta jamg‘armasi boshqaruvchi direktori Kristalina Georgiyevani qabul qildi. Bu haqda Zamin.uz xabar berdi.
Ushbu uchrashuvda ikki tomonlama hamkorlikni yanada mustahkamlash va rivojlantirish masalalari muhokama qilindi. Xalqaro valyuta jamg‘armasi rahbari O‘zbekistonda amalga oshirilayotgan iqtisodiy islohotlarni yuqori baholadi.
Shuningdek, makroiqtisodiy siyosat, byudjet va soliq ma’muriyatchiligini takomillashtirish sohalarida samarali hamkorlik davom etayotgani ta’kidlandi. Mutaxassislarimiz jahon tajribasini o‘rganish maqsadida XVJ markazlarida muntazam ravishda malaka oshirish dasturlarida ishtirok etmoqda.
Joriy yilda mamlakatimiz moliya tizimining barqarorligi birgalikda tahlil qilindi va bu borada “yo‘l xaritasi” qabul qilindi. Uchrashuv davomida pul-kredit va fiskal siyosatni rivojlantirish, shuningdek, statistika tizimini yangilash bo‘yicha jamg‘armaning ekspertlik ko‘magini davom ettirish masalalarida kelishuvlarga erishildi.
Bundan tashqari, iqtisodiy idoralar xodimlari uchun o‘quv dasturlarini kengaytirish rejalashtirilmoqda. Ushbu ma’lumotlar Prezident matbuot xizmati tomonidan taqdim etildi (manba: prezident.uz).
