O‘zbekistonda gazdan foydalanishni nazorat qilish va shaffoflikni ta’minlash maqsadida yangi UGaz axborot tizimi joriy etildi. Bu haqda Zamin.uz xabar berdi.
Ushbu tizim “Yagona integrator – Uzinfocom” tomonidan ishlab chiqilgan bo‘lib, avtomobillarga gaz to‘ldirish kompressor shoxobchalari faoliyatini real vaqt rejimida kuzatish imkonini beradi. UGaz tizimi 2024 yil 6 iyulda Vazirlar Mahkamasi tomonidan qabul qilingan “Tabiiy gaz resurslaridan oqilona foydalanish chora-tadbirlari to‘g‘risida”gi qaror asosida ishga tushirildi.
Endilikda gaz quyish shoxobchasi litsenziya olish uchun ushbu tizimdan foydalanishi majburiy hisoblanadi. Tizimning asosiy vazifalari orasida gaz quyish jarayonini real vaqt rejimida qayd etish, qo‘lda yuritiladigan hisob-kitoblarni kamaytirish, noqonuniy faoliyatlarni aniqlash, texnik xavfsizlikni ta’minlash va xizmat shaffofligini oshirish bor.
Avtomobil AGTKSHga kirishi bilan uning texnik ko‘rigi, balloni ro‘yxatdan o‘tgani yoki yo‘qligi hamda yonilg‘i turining mosligi avtomatik tarzda tekshiriladi. Muammo aniqlansa, operatorga darhol xabar beriladi.
Shuningdek, shoxobchadagi har bir kolonka va xodim faoliyati ham UGaz tizimi orqali nazorat qilinadi. Bu tizim Ichki ishlar vazirligi, Davlat soliq qo‘mitasi, Energonazorat, OneID va Toshshaxartransxizmat kabi idoralar bilan to‘liq integratsiyalashgan.
Shu tariqa, gaz sohasidagi nazorat kuchaytirilib, xizmat ko‘rsatish sifati va shaffofligi oshirilmoqda (manba: zamin.uz).
