O‘zbekiston Respublikasi Prezidenti Shavkat Mirziyoyev Nyu-York shahriga tashrifi davomida o‘z qarorgohida AQSHning yetakchi kompaniyalari rahbarlari bilan uchrashuv o‘tkazdi. Bu haqda Zamin.uz xabar berdi.
Ushbu uchrashuvda “Traxys” kompaniyasi direktorlar kengashi raisi Alan Dokter, Kolorado geologiya maktabi vitse-prezidenti Jon Bredford, “FLSmidth” kompaniyasi katta vitse-prezidenti Piter Flanagan, “McKinsey” kompaniyasining katta hamkori va Markaziy Osiyo bo‘yicha ofisi rahbari Yermolay Soljenitsin hamda “Go Green Partners” kompaniyasi bosh direktori Mixail Sedoy ishtirok etdi. Uchrashuvda AQSHning ushbu yetakchi kompaniyalari bilan hamkorlikni kengaytirishning amaliy jihatlari muhokama qilindi.
“Traxys” kompaniyasi energetik o‘tish uchun zarur bo‘lgan xomashyo va minerallarni yetkazib berish sohasida jahon yetakchilaridan biri hisoblanadi. Kompaniya bilan birgalikda geologiya-qidiruv va konlarni o‘zlashtirish bo‘yicha 1 milliard dollarlik istiqbolli loyihalar portfeli shakllantirilgan.
Muhim minerallarni qazib olish, qayta ishlash va barqaror yetkazib berish zanjirlarini yaratish uchun ilg‘or texnologiyalar va bilimlarni joriy etish bo‘yicha kelishuv va yo‘l xaritasi qabul qilindi. Kolorado konchilik maktabi tog‘-kon sanoati uchun mutaxassislar tayyorlashda yetakchi muhandislik universiteti hisoblanadi.
Ushbu ta’lim muassasasi bilan birgalikda O‘zbekiston geologiya fanlari universiteti qoshida Kompetensiyalar markazini tashkil etish masalasi ko‘rib chiqilmoqda. “FLSmidth” kompaniyasi tog‘-kon va boyitish sanoati uchun zamonaviy texnologiyalar va uskunalar ishlab chiqadi hamda mamlakatimiz mis sanoatini rivojlantirishda faol ishtirok etmoqda.
“McKinsey” kompaniyasi tog‘-kon sanoati korxonalarini boshqarish, konsalting va strategik rivojlantirish sohasida yetakchi hisoblanadi. U bilan birga xomashyo bazasini rivojlantirish, sanoat quvvatlarini kengaytirish va chuqur transformatsiya qilish strategiyasi ishlab chiqilgan.
“Go Green Partners” kompaniyasi esa “yashil” energetika uchun muhim minerallarni qazib olish va qayta ishlashga sarmoya kiritishga ixtisoslashgan bo‘lib, istiqbolli maydonlarda geologik qidiruv ishlarini olib borishni rejalashtirmoqda. Ushbu kompaniyalarning umumiy kapitallashuvi 20 milliard AQSH dollaridan oshadi.
Loyihalarni jadallashtirish va yangi takliflar tayyorlash maqsadida qo‘shma ishchi guruh tuzish hamda yo‘l xaritasini qabul qilish bo‘yicha kelishuvga erishildi (manba: zamin.uz).
