Noyabrda ehtiyojmand oilalarga 1 million so‘m yordam beriladi
Joriy yil noyabr oyida ijtimoiy qo‘llab-quvvatlash doirasida “Ijtimoiy himoya yagona reestri” va “Kambag‘al oilalar reestri”da ro‘yxatga olingan oilalarga, shuningdek, “Mahalla yettiligi” tomonidan shakllantirilgan qo‘shimcha ro‘yxatdagi ehtiyojmand oilalarga bir martalik 1 million so‘m miqdorida moddiy yordam berilishi rejalashtirilgan. Bu haqda Zamin.uz xabar berdi.
Hozirgi kunda mazkur reestrlarda 816 mingdan ortiq oila mavjud bo‘lib, “Mahalla yettiligi” tomonidan kambag‘allik xavfi yuqori bo‘lgan oilalarning 40 foizgacha qismini qo‘shimcha ro‘yxatga olish ishlari davom etmoqda. 2025 yil 19 sentyabr holatiga ko‘ra, 317 ming 698 oila qo‘shimcha ro‘yxatga kiritilgan.
Ushbu oilalar 25 sentyabrga qadar o‘z mahalla “yettiligi”ga murojaat qilib, yordam olish huquqini tasdiqlashlari kerak. Mazkur yordam dasturi davlatning ijtimoiy himoyani kuchaytirish va ehtiyojmand oilalarni moddiy qo‘llab-quvvatlash borasidagi muhim tashabbusidir.
Uning amalga oshirilishi ko‘plab oilalar uchun zarur imkoniyatlarni yaratadi. Manba: zamin.uz
