Parlamentda pulli avtomobil yo‘llari qurilishiga huquqiy asos yaratadigan qonun loyihasi ikkinchi o‘qishda ma’qullandi. Bu haqda Zamin.uz xabar berdi.
Ushbu qonunga ko‘ra, agar ma’lum bir yo‘nalishda tekin, ya’ni bepul yo‘l mavjud bo‘lsa, shundagina pulli yo‘l qurilishiga ruxsat beriladi. Oliy Majlis Qonunchilik palatasining navbatdagi majlisida «Avtomobil yo‘llari to‘g‘risida»gi qonun loyihasi batafsil ko‘rib chiqildi.
Deputatlar hujjat mamlakat yo‘l infratuzilmasini rivojlantirish va zamon talablariga moslashtirishga qaratilganini ta’kidladilar. Loyiha doirasida yo‘llarni rejalashtirish va loyihalashda aholi fikri, atrof-muhitga ta’sir va piyodalar uchun qulayliklar alohida e’tiborga olinadi.
Shuningdek, yo‘l qurilishi jarayonida kommunikatsiya tarmoqlarini tiklash xarajatlari ham qoplanishi shart qilib belgilangan. Qonun katta va og‘ir vaznli transport vositalarining harakatini tartibga solish hamda yo‘l bo‘yida xizmat ko‘rsatish obyektlarini joylashtirish bo‘yicha talablarni aniq belgilaydi.
Eng muhim jihatlardan biri — pulli trassalar to‘g‘risidagi moddalardir. Yo‘ldan foydalanish uchun belgilangan to‘lovlar aholi va iqtisodiyot ehtiyojlariga mos, ijtimoiy adolatli hamda iqtisodiy jihatdan o‘zini oqlaydigan bo‘lishi kerak.
Majlisda deputatlar qonun loyihasini tayyorlash jarayonida bildirgan fikr va takliflarni inobatga olib, hujjatni takomillashtirilgan holda ma’qullab, Senatga yuborishdi (manba: zamin.uz).
