Prezident Shavkat Mirziyoyev 24 sentyabr kuni Nyu-York shahrida AQSH Kongressi a’zosi, Vakillar palatasidagi O‘zbekiston bilan hamkorlik bo‘yicha kokus raisi Trent Kelli hamda Missisipi shtati Milliy gvardiyasi qo‘mondoni, general-mayor Bobbi Jin bilan uchrashdi. Bu haqda Zamin.uz xabar berdi.
Uchrashuvda O‘zbekiston va AQSH o‘rtasidagi strategik sheriklik munosabatlarini yanada rivojlantirish masalalari muhokama qilindi. Xususan, parlamentlararo muloqotni mustahkamlash va kengaytirish haqida so‘z bordi.
Parlamentlararo aloqalar va almashinuvlar sohasida sezilarli yutuqlar qayd etildi. AQSH Kongressining Senat va Vakillar palatasi a’zolari muntazam ravishda O‘zbekistonga tashrif buyurib, ikki mamlakat o‘rtasidagi hamkorlikni mustahkamlashga hissa qo‘shmoqda.
Shu bilan birga, O‘zbekiston bilan hamkorlik bo‘yicha kokus faoliyatini davom ettirmoqda va uning tarkibi kengaymoqda. Har yili Kongressda O‘zbekiston kunlari o‘tkazilib, parlamentlar o‘rtasidagi aloqalar mustahkamlanmoqda.
AQSHning Missisipi shtati bilan savdo-iqtisodiy hamda madaniy-gumanitar aloqalarining yuqori darajada ekanligi ta’kidlandi. Shuningdek, O‘zbekiston va AQSH o‘rtasidagi strategik sheriklikni yanada mustahkamlash hamda oliy darajada erishilgan kelishuvlarni amalga oshirishda Kongressning qo‘llab-quvvatlovi muhimligi qayd etildi.
Uchrashuv yakunida yaqinda Kongress delegatsiyasi va Missisipi shtati ishbilarmonlarining O‘zbekistonga tashrifini tashkil etish masalalarida kelishuvga erishildi. Manba: zamin.uz
