Oziq-ovqat mahsulotlariga chegirmalar joriy etiladi
O‘zbekistonda iste’mol muddati yaqinlashayotgan oziq-ovqat mahsulotlariga chegirmalar joriy etiladi. Bu haqda Zamin.uz xabar berdi.
Hukumatning yangi qaroriga muvofiq, yirik savdo markazlari va do‘konlarda maxsus rastalar tashkil etiladi. Ushbu rastalarda iste’mol muddati tugash arafasida bo‘lgan mahsulotlar joylashtiriladi va har o‘n kunda ularning narxi bosqichma-bosqich kamaytiriladi.
Bu choralar aholiga sifatli mahsulotlarni arzon narxlarda taqdim etish hamda oziq-ovqat isrofgarchiligining oldini olish maqsadida amalga oshiriladi. Shuningdek, daladan iste’molchigacha bo‘lgan barcha bosqichlarda mahsulotlarning yo‘qolishini kamaytirish choralari ko‘riladi.
Bunga yig‘ishtirish, saralash, yuklash, tashish va mahsulotlarni muzlatkichlarda saqlash kabi jarayonlar kiradi. Har bir bosqich qat’iy nazorat ostida bo‘ladi.
Qishloq xo‘jaligi mahsulotlarining sifati doimiy ravishda monitoring qilinadi. Fermerlar va dehqon xo‘jaliklari uchun maxsus o‘quv seminarlar tashkil etilib, ular hosildorlikni oshirish, bozor tahlilini o‘tkazish va kimyoviy moddalardan samarali foydalanish bo‘yicha bilim oladilar.
Hujjatga ko‘ra, 2026 yilning yanvar-fevral oylarida oziq-ovqat xomashyosi ishlab chiqarish, tashish, saqlash va sotish jarayonlari uchun sanitariya qoidalari hamda gigiyena talablarining takomillashuvi nazarda tutilgan. Shuningdek, 2026–2030 yillar "Dolzarb oziq-ovqat xavfsizligi davri" deb e’lon qilinadi.
Bu davrda aholiga yetarli miqdorda sifatli mahsulot yetkazib berish, oziq-ovqatni tejash va oqilona iste’mol qilishga alohida e’tibor qaratiladi. Shu maqsadda "Oqilona iste’mol" dasturi amalga oshiriladi.
Mutaxassislar fikricha, mazkur tashabbus nafaqat aholiga arzon va sifatli mahsulot taqdim etishga, balki mamlakatda oziq-ovqat xavfsizligini ta’minlashga ham xizmat qiladi. Ma’lumot manbai: zamin.uz.
