Oktyabr boshida O‘zbekistonda harorat pasayadi
O‘zbekiston aholisi oktyabr oyini iliq va yomg‘irli kunlar bilan boshlaydi. Bu haqda Zamin.uz xabar berdi.
Dushanba va seshanba kunlari havo asosan iliq va quruq bo‘lib, kunduzgi harorat +28 dan +33 daraja atrofida bo‘ladi. Faqat Navoiy viloyatining shimoliy hududlarida o‘rtacha darajada yomg‘ir yog‘ishi mumkin.
Chorshanba va payshanba kunlari Moskvadagi antisiklonning janubiy chekkasi O‘zbekiston hududiga kirib keladi. Natijada kuchli g‘arbiy shamollar, chang-to‘zon va yomg‘irlar kuzatilishi ehtimoli mavjud.
Harorat keskin pasayib, kunduzgi harorat +18 dan +23 darajaga, tun harorati esa +8 dan +13 darajagacha kamayadi. Shimoliy hududlarda esa harorat +5 darajagacha tushishi mumkin.
Ayrim tog‘ etaklarida ilk qor yog‘ishi ehtimoli ham bor. Juma kuni yomg‘ir asosan Farg‘ona vodiysida yog‘ishi kutilmoqda.
Shanba va yakshanba kunlari ob-havo barqarorlashib, harorat asta-sekin ko‘tariladi. Mutaxassislar oktyabr oyining kuz fasli ekanligini hisobga olib, aholini sog‘lig‘iga e’tiborli bo‘lish va ob-havoga mos kiyinishga chaqirmoqda.
Ushbu ma’lumotlar Uz24.uz saytidan olindi.
