1 oktyabr – O‘qituvchi va murabbiylar kuni munosabati bilan Prezident Shavkat Mirziyoyev barcha pedagoglarni samimiy tabrikladi. Bu haqda Zamin.uz xabar berdi.
Davlat rahbari o‘z tabrigida ustoz va murabbiylarning jamiyat taraqqiyotidagi muhim o‘rnini alohida ta’kidlab, ularning mehnatini yuksak qadrladi. Prezident so‘zlariga ko‘ra, o‘qituvchilar hayotlarini eng sharafli va mas’uliyatli kasbga bag‘ishlab, yosh avlodni bilimli, ma’naviy yetuk va vatanparvar qilib tarbiyalashda katta xizmat qilmoqda.
Shavkat Mirziyoyev kelgusida ta’lim sohasida amalga oshiriladigan islohotlar haqida ham ma’lumot berdi. 2026 yildan boshlab Qoraqalpog‘iston va barcha viloyatlarda Prezident maktablari singari “Yangi avlod” bog‘chalari tashkil etiladi.
Bu bog‘chalarda tarbiyachilar zamonaviy pedagogik texnologiyalarni chuqur o‘rganish imkoniyatiga ega bo‘ladilar. Yangi o‘quv yilidan boshlab ta’lim tizimida muhim yangiliklar joriy etiladi.
Jumladan, 12 yillik umumiy maktab ta’limiga bosqichma-bosqich o‘tish rejalashtirilmoqda. Shuningdek, 9 va 11-sinf o‘quvchilari uchun yagona davlat imtihonlari tashkil etiladi.
Imtihon natijalari bitiruvchilarga texnikum yoki oliy ta’lim muassasalariga bevosita kirish imkonini beradi. Bundan tashqari, yangi yildan boshlab 15 yildan ortiq pedagogik stajga ega bo‘lgan oliy toifali o‘qituvchilarga qo‘shimcha ijtimoiy yordam ko‘rsatiladi.
Ular uchun ipoteka krediti boshlang‘ich badalining 25 foizi davlat tomonidan qoplanadi. Mutaxassislar fikricha, ushbu chora-tadbirlar nafaqat ustoz va murabbiylarning mavqeini oshirishga, balki ta’lim tizimining samaradorligini yangi bosqichga olib chiqishga xizmat qiladi.
Manba: zamin.uz
