Abu Ali ibn Sino maktabiga yangi filiallar ochiladi
O‘zbekistonda tabiiy fanlarga ixtisoslashgan maktablar tarmog‘ini rivojlantirish maqsadida yangi qaror qabul qilindi. Bu haqda Zamin.uz xabar berdi.
Vazirlar Mahkamasi Abu Ali ibn Sino nomidagi ixtisoslashtirilgan maktabning bir qator filiallarini tashkil etishni tasdiqladi. Ushbu qarorga muvofiq, 2025 yilda bir nechta filiallar ochilishi rejalashtirilgan.
Keyingi yillarda, ya’ni 2026 va 2027 yillarda yangi filiallar qurilishi hamda mavjudlari rekonstruksiya qilinishi ko‘zda tutilgan. Toshkent shahridagi Abu Ali ibn Sino maktabi tabiiy fanlar bo‘yicha bosh maktab sifatida belgilangan bo‘lib, uning filiallari yagona standart asosida tashkil etiladi.
Filiallardagi o‘quvchilar uchun barcha zarur shart-sharoitlar yaratiladi. Filiallarga qabul 7-sinfdan boshlanadi va bir sinfda eng ko‘pi 24 nafar o‘quvchi tahsil olishi mumkin.
Qabul kvotalari ixtisoslashtirilgan ta’lim muassasalari agentligi tomonidan belgilanadi. Bundan tashqari, filiallarda o‘quvchilar turar joy bilan ta’minlanadi hamda autsorsing asosida bepul sog‘lom ovqatlanish tizimi yo‘lga qo‘yiladi.
Qurilish va rekonstruksiya ishlari Qoraqalpog‘iston Respublikasi Vazirlar Kengashi hamda viloyat hokimliklari bilan kelishilgan holda amalga oshiriladi. Yangi filiallar ta’lim sifatini oshirish bilan birga, iqtidorli yoshlar uchun keng imkoniyatlar yaratishga xizmat qiladi (manba: zamin.uz).
