Samarqandda qurilishda xavfsizlik qoidasi buzildi
Samarqand shahrida ko‘p qavatli uy qurilishi vaqtida yer cho‘kishi natijasida yo‘l bo‘yida turgan yuk mashinasi chuqurga qulab ketdi. Bu haqda Zamin.uz xabar berdi.
Bu hodisa xavfsizlik qoidalariga rioya qilinmagani sabab yuzaga kelgani ma’lum bo‘ldi. Qurilish chuquri tasdiqlangan loyiha va xavfsizlik talablariga zid ravishda qazilgan, bu esa yo‘l yaqinida yerning cho‘kib tushishiga olib kelgan.
Qurilish ishlarini “Samarqand Oxygen Service” kompaniyasi amalga oshirmoqda. Ular buzilgan ishlab chiqarish binolari o‘rnida yangi turar-joy majmuasini barpo etmoqda.
Pudratchi “Bag‘dod” ko‘chasidagi 10 va 26-uylar orasidagi yo‘lni o‘z boshqaruvi ostida toraytirib, transport va piyodalar uchun noqulay vaziyat yaratgan. 22-sentyabr kuni o‘tkazilgan inspeksiya natijasida kamchiliklarni 15 kun ichida bartaraf etish bo‘yicha ko‘rsatma berildi.
Agar ushbu talab bajarilmasa, kompaniya Ma’muriy javobgarlik kodeksiga muvofiq javobgar bo‘ladi. Mahalliy aholi qurilish ishlari davom etayotgan bo‘lsa-da, xavfsizlik choralari yetarli darajada ko‘rilmaganini ta’kidlamoqda.
Manba: uz24 nashri.
