O‘zbekiston hududiga import qilinayotgan yuqori fitosanitar xavfga ega mahsulotlar doimiy ravishda nazoratdan o‘tkaziladi. Bu haqda Zamin.uz xabar berdi.
Shu doirada olingan mandarin namunasi Markaziy fitosanitariya laboratoriyasida tekshiruvdan o‘tkazildi. Tekshiruv natijalariga ko‘ra, Qozog‘iston orqali olib kirilgan mandarin partiyasida zararli Aonidiella aurantii va Dysmicoccus brevipes organizmlari aniqlangan.
Qo‘shimcha tahlillar ushbu 22,26 tonna mahsulotning Xitoyda yetishtirilganini ko‘rsatdi. Mazkur holat yuzasidan Xitoy bilan muzokaralar olib borilmoqda.
O‘zbekistonning fitosanitar talablariga mos hududlardan mahsulot eksportini amalga oshirish choralari ko‘rilmoqda. So‘nggi paytlarda Qozog‘iston orqali import qilinayotgan ayrim mandarin partiyalarida fitosanitar sertifikatlarda kelib chiqish mamlakati sifatida Janubiy Afrika, Turkiya yoki boshqa davlatlar ko‘rsatilgan.
Biroq yorliqlarda mahsulotning Xitoyda yetishtirilgani aniqlangan. Zararli organizmlar aniqlangan ushbu partiya Xitoyda yetishtirilgani sababli Xitoy mandarinlari importiga vaqtinchalik cheklov joriy qilindi.
Shu bilan birga, Qozog‘istonning mas’ul organlariga reeeksport fitosanitar sertifikatlarini rasmiylashtirishda mahsulotning haqiqiy kelib chiqish mamlakati ISPM №12 talablariga muvofiq to‘g‘ri ko‘rsatish bo‘yicha rasmiy so‘rov yuborildi. Bu chora import xavfsizligini ta’minlash va fitosanitar talablarni qat’iy bajarish maqsadida amalga oshirilmoqda.
Manba: zamin.uz
