Mirziyoyev Ozarbayjonda Turkiy sammitida ishtirok etadi
O‘zbekiston Prezidenti Shavkat Mirziyoyev Ozarbayjon Prezidenti Ilhom Aliyevning taklifiga binoan 6-7 oktyabr kunlari Ozarbayjon Respublikasiga amaliy tashrif bilan boradi. Bu haqda Zamin.uz xabar berdi.
Bu haqda Prezident matbuot xizmati ma’lum qildi. Tashrif davomida davlat rahbari Turkiy davlatlar tashkilotining Gabala shahrida o‘tadigan navbatdagi sammitida ishtirok etadi.
Ushbu sammit “Mintaqaviy tinchlik va xavfsizlik” mavzusiga bag‘ishlangan bo‘lib, tashkilot doirasidagi ko‘p tomonlama hamkorlikni rivojlantirish va kengaytirishga oid masalalar muhokama qilinadi. Sammitda siyosat, savdo va iqtisodiyot, innovatsiya, investitsiya, energetika, transport va kommunikatsiya, shuningdek, gumanitar sohalardagi amaliy hamkorlik istiqbollari haqida fikr almashiladi.
Delegatsiyalar rahbarlari xalqaro siyosatning dolzarb muammolari bo‘yicha ham o‘zaro tajriba almashadilar. Yig‘ilish yakunida tashkilotga a’zo davlatlar o‘rtasidagi manfaatli hamkorlikni yanada mustahkamlash maqsadida bir qator qo‘shma qarorlar va hujjatlar qabul qilinishi rejalashtirilgan.
Ma’lumot manbai: prezident matbuot xizmati, one.uz.
