Samarqand mayizi davlat ro‘yxatiga kiritildi
Samarqand viloyatining Qo‘shrabot tumanida ilk bor o‘tkazilgan “Mayiz sayli” festivalida “Samarqand mayizi” geografik ko‘rsatkich sifatida davlat ro‘yxatiga kiritildi. Bu haqda Zamin.uz xabar berdi.
Bu haqda Samarqand viloyati hokimligi ma’lum qildi. Tadbirda viloyat hokimining vazifasini bajaruvchi Adiz Boboyev, Adliya vaziri Akbar Toshqulov, turli vazirliklar vakillari, ommaviy axborot vositalari va keng jamoatchilik ishtirok etdi.
Marosimda “Samarqand mayizi”ning davlat ro‘yxatidan o‘tkazilishi bo‘yicha rasmiy hujjat taqdim etildi. Ma’lumotlarga ko‘ra, o‘tgan yili Samarqand viloyatida 663 ming tonna uzum yetishtirilgan bo‘lsa, joriy yilda bu ko‘rsatkich 700 ming tonnaga yetishi kutilmoqda.
Yilning birinchi yarmida 2 ming tonna uzum va 34,2 ming tonna mayiz eksport qilindi. Qo‘shrabot tumanida 7 ming gektar maydonda uzum yetishtiriladi, yiliga 50–55 ming tonna hosil olinadi va uning katta qismi mayizga aylantiriladi.
Shuningdek, “Qo‘shrabot mayizi” tovar belgisi ham davlat ro‘yxatiga kiritildi (manba: samarqand.uz).
