Vazirlar Mahkamasi oliy va kasbiy ta’lim bitiruvchilarining amaliyot o‘tashi hamda ishga joylashtirish tizimini raqamlashtirish haqida qaror qabul qildi. Bu haqda Zamin.uz xabar berdi.
Ushbu qarorga muvofiq, prezident topshirig‘i asosida amaliyot, malaka oshirish va ishga qabul qilish jarayonlari qog‘ozsiz, elektron shaklda soddalashtirilgan tartibda amalga oshiriladi. Yangi nizomga ko‘ra, amaliyotga yo‘naltirish va ishga joylashtirish maxsus elektron platforma orqali bajariladi.
Bitiruvchilarning amaliyotini tashkil etish bo‘yicha shartnomalar aynan shu platformada ro‘yxatdan o‘tkaziladi. Shuningdek, ishga joylashish natijalari monitoringi “Yagona milliy mehnat tizimi” bilan integratsiya qilinadi.
Elektron platformani Oliy ta’lim, fan va innovatsiyalar vazirligining Raqamli ta’lim texnologiyalarini rivojlantirish markazi ishlab chiqadi. Yangi tizim orqali talabalar va bitiruvchilar amaliyot joyiga ariza yuborish, javob olish hamda shartnomani ro‘yxatdan o‘tkazishning barcha bosqichlarini bitta platformadan amalga oshiradilar.
Oliy ta’lim muassasalari va kollejlar har yili yakuniy davlat attestatsiyasi natijalari asosida bitiruvchilar haqidagi ma’lumotlarni platformaga kiritib, ularning bandligini onlayn ravishda kuzatadi. Korxona va tashkilotlar esa har oy 25-sanasigacha talab qilinayotgan kadrlar hamda vakant lavozimlar ro‘yxatini tizimga joylashtiradi.
Bundan tashqari, ta’lim muassasalari har yil avgust oyida “Elektron hukumat”ning idoralararo integratsiyalashuv platformasi orqali ishga joylashgan bitiruvchilar haqidagi ma’lumotlarni muntazam kiritib boradi. Yangi tartib amaliyot va ishga joylashish jarayonlarini shaffof, tezkor va qog‘ozsiz qiladi.
Bitiruvchi amaliyotdan ishgacha bo‘lgan barcha jarayonlarni bitta platforma orqali boshqaradi, ta’lim muassasasi monitoringni amalga oshiradi, ish beruvchi esa kadrlarni izlashda yagona ma’lumotlar bazasidan foydalanadi. Bu esa takroriy ma’lumot kiritish, sun’iy hisobotlar va uzilishlarning oldini oladi.
Natijada, bitiruvchilar uchun amaliyotdan ishgacha bo‘lgan yo‘l yanada qulay va samarali shaklda tashkil etiladi. Manba: zamin.uz.
