Saida Mirziyoyeva Qoraqalpog‘istonda tibbiyotni rivojlantirdi
O‘zbekiston prezidenti administratsiyasi rahbari Saida Mirziyoyeva Qoraqalpog‘istonga tashrif buyurdi. Bu haqda Zamin.uz xabar berdi.
U Nukus shahridagi 12 ta oilaviy poliklinika hamda 3 ta jamoat maskanida aholining diagnostikadan o‘tkazilayotganini ma’lum qildi. Shu bilan birga, bemorlarni yo‘naltirish va raqamlashtirish tizimi muvaffaqiyatli joriy etilmoqda.
Shifokorlarning hamkorlikdagi sa’y-harakatlari va sun’iy intellekt yechimlari, jumladan AI TOP-3 CDSS, MuxlisaMED AI hamda AI Mammo tizimlari orqali tibbiy yordam ko‘rsatish yanada tezkor va aniq bo‘lib bormoqda. Atigi to‘rt kun davomida qariyb 12 ming nafar fuqaro ko‘rikdan o‘tkazilib, 1700 dan ortig‘i chuqur tekshiruvlarga yuborildi, 116 nafari esa davolanishga yo‘naltirildi.
Shuningdek, Qoraqalpog‘iston tibbiyot instituti bolalar jarrohligi bo‘limida murakkab operatsiyalarni boshdan kechirgan kichik bemorlar bilan uchrashuv o‘tkazildi. Ularning matonati va samimiy tabassumlari barcha ishtirokchilarni chuqur ta’sirlantirdi.
Ikkita yangi loyiha — raqamli oilaviy pasportga asoslangan «Oilaviy salomatlik maktabi» va yoshlar ko‘magida aholi tibbiy savodxonligini oshirishga qaratilgan «Salomatlik volontyorlari» dasturlari ishga tushirildi. Saida Mirziyoyeva sog‘liqni saqlashni zamon talablariga mos, har bir inson uchun qulay va samarali tizimga aylantirishni maqsad qilgan «Tibbiyot novatorlari» jamoasidagi yosh mutaxassislarga minnatdorlik bildirdi.
U millat salomatligini umumiy mas’uliyat deb atab, barchani birgalikda harakat qilishga chaqirdi. Manba: Telegram / Saida Mirziyoyeva.
