Mo‘g‘uliston go‘shti O‘zbekistonga eksport qilinadi
Mo‘g‘uliston go‘sht va go‘sht mahsulotlarining asosiy eksport bozorlariga O‘zbekiston, Xitoy, BAA, Qatar, Qozog‘iston va Vetnam kiradi. Bu haqda Zamin.uz xabar berdi.
Mamlakat Oziq-ovqat, qishloq xo‘jaligi va yengil sanoat vazirligi ma’lumotlariga ko‘ra, 2025-yilning dastlabki sakkiz oyida Mo‘g‘uliston jami 18,1 ming tonna go‘sht va go‘sht mahsulotlarini eksport qilgan. Bu ko‘rsatkich o‘tgan yilning mos davriga nisbatan 10,9 foizga kamdir.
Eksport tarkibining 63 foizi qo‘y va echki go‘shtidan tashkil topgan. Ma’lumotlarga ko‘ra, mahsulotlarning asosiy qismi Xitoy, BAA, Qatar, Qozog‘iston, O‘zbekiston va Vetnamga yetkazilgan.
Mo‘g‘uliston iqtisodiyotida chorvachilik katta ahamiyatga ega bo‘lib, aholining taxminan 40 foizi shu sohadan tirikchilik qiladi. Biroq, uzoq va qattiq qish fasllari sababli ko‘plab chorvadorlar yil sayin chorvalarini yo‘qotadi.
Milliy statistika qo‘mitasining ma’lumotlariga ko‘ra, 2024-yil oxirida mamlakatda jami 57,6 million bosh chorva mavjud bo‘lgan. Shuningdek, 2025-yil 27 iyun kuni Mo‘g‘uliston va O‘zbekiston rasmiylari o‘rtasida halol ot va qo‘zi go‘shtini yetkazib berish bo‘yicha 2000 tonnalik kelishuvga erishilgan.
Bu kelishuv ikki davlat o‘rtasidagi savdo aloqalarini yanada mustahkamlashga xizmat qiladi (manba: zamin.uz).
