Oktyabrda yog‘in kam, qish quruq o‘tishi mumkin
Kuz fasli o‘zining so‘nggi bosqichiga kirgan bo‘lsa-da, tabiatdagi holat hali ham o‘ziga xos tashvishlarni yuzaga keltirmoqda. Bu haqda Zamin.uz xabar berdi.
Iqlimshunos olim Erkin Abdulahatovning ma’lum qilishicha, oktyabr oyida ob-havo asosan quruq bo‘lishi kutilmoqda. Bu yilgi ob-havo sharoiti va namlikning yetishmasligi kelayotgan qish mavsumiga salbiy ta’sir ko‘rsatishi mumkin.
Mutaxassisning ta’kidlashicha, odatda oktyabr oyida yer namligi tiklanadi, ammo bu yil bu jarayon sezilarli darajada kamaygan. Havo oqimlari ham avvalgidek kuchli emas, shuning uchun tabiatda namlik yetishmovchiligi kuzatilmoqda.
Bu holat qishloq xo‘jaligi uchun katta xavf tug‘diradi, chunki asosiy ekin maydonlari va yaylovlarda, ayniqsa lalmi yerlar namliksiz qolmoqda. Oktyabr oyida normal sharoitda tushishi kerak bo‘lgan yog‘in miqdorining atigi 50-80 foizi yog‘ishi mumkinligi aytilmoqda.
Bu esa qish mavsumining quruq va issiq o‘tish ehtimolini oshiradi. Natijada, kelayotgan qish na sovuq, na ko‘p yomg‘ir bilan keladi, ammo quruqlik va namlik yetishmasligi ko‘plab sohalar uchun jiddiy sinov bo‘ladi.
Shu bois iqlimshunoslar ushbu holatga jiddiy e’tibor qaratishni tavsiya qilmoqda (manba: zamin.uz).
