Shaxs tasvirini olish uchun rozilik majburiy qilindi
Qonunchilik palatasining navbatdagi majlisida inson tasvirini suratga olish va undan foydalanishga doir muhim o‘zgarishlar muhokama qilindi va tegishli qonun loyihasi ma’qullandi. Bu haqda Zamin.uz xabar berdi.
Endilikda kimningdir suratini yoki videosini olish hamda uni tarqatish uchun albatta yozma yoki og‘zaki rozilik olinishi talab etiladi. Bu o‘zgarish shaxsiy hayotni himoya qilishga qaratilgan.
Yangi qonun loyihasida bolalarning tasvir huquqi alohida himoyalanishi belgilandi. Bola o‘z tasviri bo‘yicha mustaqil huquq subyekti sifatida tan olingan.
Shuningdek, 16 yoshga to‘lmagan shaxslarning tasvirini olish va undan foydalanish uchun ularning ota-onasi yoki qonuniy vakilining roziligi zarur hisoblanadi. Loyihada suratga olish va tasvirdan foydalanish qoidalari aniq va tushunarli shaklda belgilandi.
Qaysi holatlarda shaxsning roziligisiz tasvir olish mumkinligi aniq ko‘rsatib o‘tildi, bu esa turli talqinlarning oldini oladi. Bundan tashqari, jamoat joylarida o‘rnatiladigan videokuzatuv kameralariga ham qat’iy qoidalar joriy etildi.
Kameralar o‘rnatilgan joylarda ko‘zga tashlanadigan va oson tushuniladigan ogohlantiruvchi belgilar bo‘lishi majburiydir. Shaxsiy hayotga daxldor hududlarda, masalan, kiyim almashtirish xonalari va hojatxonalar kabi joylarda video kuzatuv o‘rnatish taqiqlanadi.
Qonun loyihasi deputatlar tomonidan ma’qullanib, Senatga yuborildi. Hujjat kuchga kirgach, surat va video bilan bog‘liq huquqiy munosabatlar yanada tartibga solinib, fuqarolarning shaxsiy hayotini himoya qilish mexanizmi mustahkamlanadi (manba: zamin.uz).
