International Media Service (IMS) tomonidan 2025-yil avgust oyiga tayyorlangan hisobotga ko‘ra, O‘zbekiston televideniye reklama bozorida yetakchi brendlar va yo‘nalishlar aniqlandi. Bu haqda Zamin.uz xabar berdi.
Hisobot Kantar Media ma’lumotlariga asoslangan bo‘lib, asosiy o‘lchov sifatida 18-54 yoshdagi auditoriya orasidagi reklama qamrovini o‘lchovchi WGRP (Weighted Gross Rating Point) ko‘rsatkichi ishlatilgan. Eng faol kategoriyalar qatorida alkogolsiz ichimliklar 41 foizlik ulush bilan birinchi o‘rinda turibdi.
Ushbu yo‘nalishda Coca-Cola brendi yetakchilik qilmoqda. Farmatsevtika sektori esa 11 foizlik ulush bilan yana TOP-3’likka qaytdi.
Bank sektori esa eng tez o‘sayotgan yo‘nalish hisoblanadi, chunki o‘tgan yilga nisbatan WGRP ko‘rsatkichi ikki baravar oshgan. Eng faol televideniye brendlari orasida Coca-Cola 9,1 foiz bilan birinchi o‘rinda, undan keyin Pepsi 7,4 foiz va Ava Lemonade 5,1 foiz bilan kelmoqda.
Wildberries 4,1 foiz, Piala Gold esa 3,4 foiz ulushga ega. Shuningdek, Lipton, Anorbank, Asu, Mirinda va NBU kabi brendlar ham ro‘yxatda bor.
Eng yirik reklama beruvchilar qatorida IBT 15,9 foiz ulush bilan yetakchi bo‘lib, Coca-Cola 12,6 foiz bilan ikkinchi o‘rinda turadi. RG Brands South 6,9 foiz, Wildberries 4,4 foiz va Anorbank 3,8 foiz ulushga ega.
Keyingi o‘rinlarda NBU, Colgate-Palmolive, L’Oréal, Polpharma va Unilever kabi kompaniyalar joylashgan. 2024-yilga nisbatan eng katta o‘sish NBU tomonidan to‘rt barobar, RG Brands tomonidan esa 2,5 baravar qayd etildi.
Anglesey Food va Polpharma 80 foizga yaqin o‘sish ko‘rsatgan bo‘lsa, Coca-Cola 55 foizga o‘sdi. Mondelez va Colgate-Palmolive 34-37 foiz, Salar Meat va Yuriya Farm esa 15-19 foiz o‘sish bilan ajralib turdi.
Umuman olganda, Coca-Cola televideniye reklama bozorida yetakchilikni saqlab qolmoqda, Pepsi ikkinchi o‘rinda joylashgan. Bank sektori va farmatsevtika sohalari faol rivojlanmoqda.
Wildberries va Anorbank esa tez o‘sayotgan yangi brendlar sifatida e’tiborni tortmoqda. Ushbu ma’lumotlar International Media Service (IMS) tomonidan taqdim etilgan hisobotga asoslanadi.
