O‘zbekiston Respublikasida chet ellik fuqarolar uchun yangi soliq rejimi joriy etiladi. Bu haqda Zamin.uz xabar berdi.
Prezident farmoniga asosan, 2026-yil 1-yanvardan boshlab ushbu yangi tartib kuchga kiradi. Yangi soliq siyosatiga ko‘ra, O‘zbekistondan tashqarida olinadigan daromadlar jismoniy shaxslar daromad solig‘idan ozod qilinadi.
Biroq, bu imtiyozdan foydalanish uchun ikki muhim shart bajarilishi zarur. Birinchidan, maxsus yig‘im sifatida 50 ming dollar miqdorida to‘lov amalga oshirilishi lozim.
Ikkinchidan, chet ellik shaxs O‘zbekistondagi vakolatli tijorat bankida hisob raqamiga ega bo‘lishi yoki kriptobirjada kriptovalyuta hisobini ochishi talab etiladi. Shuningdek, farmonda soliq rezidentligi mezonlari ham belgilangan.
Agar jismoniy shaxs bir yil davomida O‘zbekistonda 30 kundan ortiq vaqt qolsa va mamlakatda ko‘chmas mulkka egalik qilsa yoki uni ijaraga olsa, u soliq rezidenti hisoblanadi. Ushbu choralar xorijiy investitsiyalarni jalb qilish va chet ellik fuqarolar uchun qulay iqtisodiy muhit yaratish maqsadida qabul qilingan.
Manba: Uznews.
