Yoshlar uchun yashil tashabbuslar jamg‘armasi tashkil etildi

O‘zbekiston Respublikasi Vazirlar Mahkamasining 2025 yil 8 oktyabrdagi 631-sonli qarori bilan “Yoshlar ishlari agentligi huzuridagi Yashil tashabbuslarni qo‘llab-quvvatlash jamg‘armasi to‘g‘risida” nizom tasdiqlandi. Bu haqda Zamin.uz xabar berdi.

Ushbu nizom jamg‘arma mablag‘larini shakllantirish, ulardan foydalanish, moliyalashtirish tartibini, shuningdek hisob va hisobot yuritish qoidalarini belgilaydi. Jamg‘arma faoliyatini boshqarish mexanizmlari ham aniq ko‘rsatib o‘tilgan.

Jamg‘arma mablag‘lari yoshlarning tabiatni asrashga, chiqindilarni qayta ishlashga, yashil energiya manbalaridan foydalanishga, daraxt ekishga va boshqa ekologik loyihalarni amalga oshirishga yo‘naltiriladi. Bu orqali mamlakatda ekologik barqarorlikni ta’minlashda yoshlarning faol ishtiroki rag‘batlantiriladi.

Mazkur tashabbus yoshlarning atrof-muhitni muhofaza qilish borasidagi g‘oyalarini qo‘llab-quvvatlashga xizmat qiladi. Manba: zamin.uz