Mirziyoyev va Rahmon Dushanbeda uchrashdi
Dushanbe shahrida O‘zbekiston Respublikasi Prezidenti Shavkat Mirziyoyev va Tojikiston Respublikasi Prezidenti Emomali Rahmon o‘rtasida rasmiy uchrashuv bo‘lib o‘tdi. Bu haqda Zamin.uz xabar berdi.
Suhbat boshida O‘zbekiston yetakchisi Tojikiston Prezidentini Mustaqil Davlatlar Hamdo‘stligiga raisligi munosabati bilan samimiy tabrikladi hamda Markaziy Osiyo va Rossiya davlatlari o‘rtasidagi hamkorlik formatidagi kelgusidagi yig‘ilishlarning muvaffaqiyatli o‘tishini tiladi. Uchrashuvda ikki davlat o‘rtasidagi do‘stlik, yaxshi qo‘shnichilik, strategik sheriklik va ittifoqchilik munosabatlarini yanada mustahkamlash va kengaytirish masalalari muhokama qilindi.
Tomonlar ikki tomonlama hamkorlikning ijobiy sur’atda rivojlanayotgani, savdo aylanmasi va yuk tashish hajmining oshib borayotgani, shuningdek aviaqatnovlar sonining ko‘payishi bilan mamnunlik bildirishdi. Savdoni yanada ko‘paytirish, sanoat, energetika va qishloq xo‘jaligi sohalarida qo‘shma loyihalarni amalga oshirish bo‘yicha muvofiqlashtirilgan chora-tadbirlarni qabul qilishga alohida e’tibor qaratildi.
Shuningdek, madaniy-gumanitar almashinuvlarni faollashtirish va hududlararo samarali aloqalarni davom ettirish muhimligi ta’kidlandi. Uchrashuv davomida xalqaro va mintaqaviy ahamiyatga ega masalalar, jumladan, joriy yil noyabr oyida Toshkent shahrida o‘tkazilishi rejalashtirilgan Markaziy Osiyo davlatlari rahbarlarining maslahat uchrashuviga tayyorgarlik ko‘rish borasida ham fikr almashildi (manba: zamin.uz).
