O‘zbekiston Respublikasi Prezidenti Shavkat Mirziyoyev 10-oktyabr kuni Tojikiston poytaxti Dushanbe shahrida o‘tkazilgan Mustaqil Davlatlar Hamdo‘stligi Davlat rahbarlari kengashining navbatdagi yig‘ilishida ishtirok etdi. Bu haqda Zamin.uz xabar berdi.
Tadbirda a’zo davlatlar o‘rtasidagi amaliy hamkorlikni kengaytirish, shuningdek, mintaqaviy ahamiyatga ega dolzarb masalalar muhokama qilindi. Davlat rahbari o‘z nutqida global siyosat va iqtisodiyotdagi noaniqliklarga qaramay, MDH tashkiloti barqarorlik va samaradorlikni saqlab qolayotganini ta’kidladi.
U xalqaro institutlar nufuzining pasayib borayotgan bir paytda Hamdo‘stlikning o‘ziga xos o‘rni borligini qayd etdi. Shuningdek, mintaqada xavfsizlik va barqarorlikni ta’minlash masalalariga alohida e’tibor qaratildi.
Prezident tashqi ishlar vazirliklari va maxsus xizmatlar o‘rtasidagi hamkorlikni mustahkamlash zarurligini ta’kidlab, tizimli muloqotning muhimligini bildirdi. Mirziyoyev Afg‘onistondagi vaziyatga ham e’tibor qaratib, mintaqaviy barqarorlik uchun ushbu mamlakatdagi holatni doimiy nazoratda ushlab turish lozimligini aytdi.
U O‘zbekistonning Afg‘onistonda uzoq muddatli tinchlik va barqaror taraqqiyotni ta’minlash tarafdori ekanini ta’kidlab, bu borada yirik investitsiya va infratuzilma loyihalarini birgalikda amalga oshirish imkoniyatlarini ko‘rib chiqishni taklif qildi. Yig‘ilish yakunida Prezident Shavkat Mirziyoyev MDH Bosh kotibi Sergey Lebdevning lavozimida qolishini qo‘llab-quvvatladi va Turkmaniston rahbari Serdar Berdimuhamedovni tashkilotga raislikni qabul qilgani bilan tabrikladi.
Sammitda a’zo davlatlar rahbarlari ham so‘zga chiqib, MDH doirasidagi hamkorlikning ustuvor yo‘nalishlari bo‘yicha bir qator kelishuvlar va muhim qarorlar imzolandi. Ushbu yig‘ilish mintaqadagi siyosiy, iqtisodiy va xavfsizlik sohalaridagi aloqalarni yanada mustahkamlashga xizmat qildi (manba: zamin.uz).
