Havoni ifloslantirganlarga qattiq jarimalar joriy qilinadi
Atmosfera havosini muhofaza qilish qoidalariga rioya qilmaslik ma’muriy javobgarlikka olib keladi. Bu haqda Zamin.uz xabar berdi.
O‘zbekiston Respublikasi Ma’muriy javobgarlik to‘g‘risidagi kodeksning 88-moddasiga asosan, havoni ifloslantirish holatlarida turli miqdorlarda jarimalar belgilangan. Qurilish ishlari davomida yonilg‘i yoki bitumni noto‘g‘ri yoqish holatida fuqarolarga belgilangan bazaviy hisoblash miqdorining uchdan biridan to bir baravarigacha, mansabdor shaxslarga esa bir baravardan uch baravarigacha jarima solinadi.
Agar huquqbuzarlik takrorlansa, fuqarolarga bir baravardan uch baravarigacha, mansabdor shaxslarga esa uch baravardan yetti baravarigacha jarima qo‘llaniladi. Shuningdek, ang‘iz, xazon yoki shox-shabbalarni yoqish orqali havoni ifloslantirish uchun fuqarolarga uchdan besh baravarigacha, mansabdor shaxslarga esa besh baravardan o‘n baravarigacha jarima belgilanadi.
2020 yildan 2024 yilgacha bo‘lgan davrda 419 nafar shaxs ushbu modda bo‘yicha javobgarlikka tortilgan, joriy yilning birinchi yarmida esa 18 nafar kishi jarimaga tortilgan. Ekologlar aholiga havoni toza saqlash, chiqindilarni yoqmaslik va qonun talablariga qat’iy rioya etishni tavsiya qilmoqda (manba: zamin.uz).
