Yo‘lovchilar uchun elektron bojxona deklaratsiyasi joriy etildi
O‘zbekistonda elektron bojxona deklaratsiyasini topshirish tizimi joriy etildi. Bu haqda Zamin.uz xabar berdi.
Endi fuqarolar “Yo‘lovchi deklaratsiyasi” mobil ilovasi orqali smartfon va boshqa tovarlarni bojxonada ro‘yxatdan o‘tkazish imkoniga ega bo‘ldilar. Hozirda ushbu xizmat faqat Toshkent xalqaro aeroporti orqali kirib kelayotgan sayohatchilar uchun mavjud.
Biroq 2025 yil 1 noyabrdan boshlab bu tizim barcha chegara o‘tish punktlarida faoliyat yuritadi. Ilova foydalanuvchining pasport ma’lumotlari asosida deklaratsiyaning asosiy bo‘limlarini avtomatik to‘ldiradi.
Faqat kirish yoki chiqish mamlakati hamda olib kirilayotgan valyuta va tovarlar haqida ma’lumot kiritish talab etiladi. Bundan tashqari, smartfonlarni ro‘yxatdan o‘tkazishda 15 raqamli IMEI-kodni avtomatik skanerlash imkoniyati mavjud bo‘lib, bu ma’lumotlarni qo‘lda kiritish zaruratini yo‘q qiladi.
Eng muhimi, yo‘lovchilar deklaratsiyani o‘zlariga qulay vaqtda va joyda to‘ldirishlari mumkin. Chegara punktlarida maxsus infokiosklar hamda bepul Wi-Fi zonalari tashkil etiladi.
Ushbu yangilik haqida batafsil ma’lumot Kursiv.media sayti orqali e’lon qilingan.
