So‘nggi kunlarda ijtimoiy tarmoqlarda metan gazini to‘ldirish shoxobchalariga limit qo‘yilgani haqida turli xabarlar tarqaldi. Bu haqda Zamin.uz xabar berdi.
Ko‘plab foydalanuvchilar bu masala bo‘yicha o‘z fikrlarini bildirishdi. Ammo “Hududgazta’minot” aksiyadorlik jamiyati ushbu ma’lumotlarni rad etdi va rasmiy bayonot berdi.
Ma’lumotga ko‘ra, metan gazini to‘ldirish shoxobchalarining faoliyatiga cheklov yoki limit joriy etilishi haqidagi xabarlar mutlaqo asossizdir. Hozirgi kunda mamlakat bo‘ylab barcha metan stansiyalari belgilangan tartibda ishlamoqda.
Kuz-qish mavsumiga tayyorgarlik doirasida gaz ta’minoti tizimidagi ayrim gaz taqsimlash stansiyalarida rejalashtirilgan profilaktika va ta’mirlash ishlari olib borildi. Shu sababli qisqa muddat davomida ayrim hududlarda gaz bosimi pasaydi va natijada ba’zi metan to‘ldirish shoxobchalarida vaqtinchalik uzilishlar yuzaga keldi.
“Hududgazta’minot” tashkiloti ta’kidlashicha, bu holat tabiiy hisoblanadi va hech qanday cheklov yoki limit bilan bog‘liq emas. Hozirda gaz ta’minoti tizimi barqaror ishlamoqda, barcha metan shoxobchalari korxonalar bilan tuzilgan shartnomalar asosida gaz olmoqda.
Shuningdek, kompaniya aholiga tekshirilmagan, yolg‘on ma’lumotlarga ishonmaslikni tavsiya etdi. Ijtimoiy tarmoqlarda haqiqatga to‘g‘ri kelmaydigan ma’lumotlarni tarqatish orqali odamlar orasida sarosima va shubha uyg‘otish qonun bilan taqiqlangan.
Bunday harakatlar uchun javobgarlik belgilanganligi eslatildi. Batafsil ma’lumotni hududgazta’minot.uz saytidan topish mumkin.
