Maktabgacha, umumiy o‘rta hamda maktabdan tashqari ta’lim muassasalarida faoliyat yuritayotgan pedagoglar uchun 2025 yilning avgust oyidan dekabr oyigacha o‘tkaziladigan malaka sinovlari jadvali aniqlandi. Bu haqda Zamin.uz xabar berdi.
Ta’lim inspeksiyasi tomonidan e’lon qilingan qarorga ko‘ra, sinovlar 21 oktabrdan boshlab bosqichma-bosqich turli fan yo‘nalishlari bo‘yicha o‘tkaziladi. 21 oktabr kuni rus tili (milliy maktablarda), rus tili va adabiyoti, tojik, turkman, qirg‘iz va qozoq tillari hamda adabiyotlari fanlaridan sinovlar bo‘lib o‘tadi.
22 oktabrda geografiya, biologiya va iqtisodiy bilim asoslari fanlari sinovlari rejalashtirilgan. 23 oktabr kuni informatika va axborot texnologiyalari bo‘yicha testlar o‘tkaziladi.
24 oktabrda maktabgacha ta’lim muassasalari tarbiyachilari, psixologlar, musiqa rahbarlari, chet tillari o‘qituvchilari (ingliz, rus, fransuz, nemis tillari), jismoniy tarbiya, defektolog va logoped mutaxassislar hamda metodistlar uchun sinovlar tashkil etiladi. 25 oktabrda jismoniy tarbiya va musiqa madaniyati fanlari sinovlari o‘tkaziladi.
27 oktabrda tarix, davlat va huquq asoslari hamda tarbiya fanlari bo‘yicha testlar bo‘ladi. 28 va 29 oktabr kunlari o‘zbek tili va adabiyoti (o‘zbek sinflari uchun) hamda davlat tili bo‘yicha sinovlar o‘tkaziladi.
29 oktabrda kimyo va fizika fanlari bo‘yicha sinovlar rejalashtirilgan. 30 va 31 oktabr kunlari umumta’lim maktablarining ingliz tili o‘qituvchilari uchun testlar bo‘lib o‘tadi.
1 noyabrda tasviriy san’at, chizmachilik va texnologiya fanlari hamda chaqiruvga qadar boshlang‘ich tayyorgarlik yo‘nalishi bo‘yicha sinovlar o‘tkaziladi. 3 dan 7 noyabrgacha boshlang‘ich ta’lim o‘qituvchilari sinovdan o‘tadi.
7 noyabr kuni fransuz, nemis, yapon, koreys va xitoy tillari hamda psixolog, defektolog va logoped mutaxassislar uchun sinovlar tashkil etiladi. 8 noyabrda O‘zbekiston Badiiy akademiyasi va Madaniyat vazirligi tizimidagi ta’lim tashkilotlari pedagoglari pedagogik mahoratini baholashdan o‘tadi.
10 va 11 noyabr kunlari matematika fanidan sinovlar o‘tkaziladi. 11 va 12 noyabrda qoraqalpoq tili (davlat tili sifatida) hamda qoraqalpoq tili va adabiyoti yo‘nalishlari bo‘yicha testlar bo‘ladi.
Pedagoglar malaka toifasi sinovlariga shaxsiy identifikatsiya ID-kartasi yoki fuqarolik pasporti bilan kelishlari shart. Sinov kunlari zaruratga ko‘ra o‘zgartirilishi yoki qo‘shimchalar kiritilishi mumkin.
Bunday hollarda pedagoglar oldindan xabardor qilinadi. Ushbu malaka sinovlari pedagoglarning bilim va tajribasini baholashda muhim ahamiyatga ega hisoblanadi.
Manba: Ta’lim inspeksiyasi rasmiy ma’lumotlari.
