O‘zbekistonda chiqindi tashlash bo‘yicha 770 huquqbuzarlik aniqlandi
O‘zbekistonda tozalik va ozodalik oyligi doirasida olib borilayotgan nazorat tadbirlarining dastlabki ikki kunida chiqindi tashlash bilan bog‘liq 770 dan ortiq huquqbuzarlik holatlari aniqlangan. Bu haqda Zamin.uz xabar berdi.
Ekologiya vazirligi matbuot xizmati ma’lumotiga ko‘ra, belgilanmagan joylarga chiqindi tashlagan fuqarolar va tashkilotlarga nisbatan qonun doirasida qat’iy choralar ko‘rilmoqda. Xususan, 15 oktyabr kuni mamlakat bo‘ylab 328 ta huquqbuzarlik qayd etilib, ularga jami 224 million 360 ming so‘m jarima solingan.
Keyingi kuni, ya’ni 16 oktyabrda esa 443 ta holat aniqlanib, jami 310 million 340 ming so‘m jarima belgilangan. Shuningdek, 1095 ta korxona va fuqarolar bilan atrof-muhitni ifloslantirmaslik bo‘yicha profilaktika suhbatlari o‘tkazilgan.
Ushbu tadbirlarning asosiy maqsadi aholining ekologik madaniyatini oshirish va jamoat joylarida tozalikni ta’minlashdan iborat. Nazorat choralari davom ettirilmoqda va qonun buzilishlariga nisbatan keskin munosabat saqlanmoqda.
Manba: Ekologiya vazirligi matbuot xizmati.
