Toshkentda havo ifloslanishini kamaytirish choralari qabul qilindi
Toshkent shahrida va viloyatda havo ifloslanishini kamaytirish hamda iqlim o‘zgarishi oqibatlarini yumshatish maqsadida yangi kompleks chora-tadbirlar ishlab chiqildi. Bu haqda Zamin.uz xabar berdi.
Bu haqda Ekologiya vazirligi ma’lum qildi. Ushbu loyiha Vazirlar Mahkamasiga ko‘rib chiqish uchun taqdim etilgan bo‘lib, uning asosiy vazifasi sanoat korxonalari va issiqxonalardan chiqadigan zararli moddalar miqdorini sezilarli darajada kamaytirishdan iborat.
Hujjatda korxonalarda chang va gaz tozalash uskunalarini o‘rnatish, shuningdek, eski qozonlarni energiya tejamkor va ekologik toza tizimlarga almashtirish ko‘zda tutilgan. Bundan tashqari, ko‘mir yoqilg‘isidan foydalanish bosqichma-bosqich kamaytiriladi va alternativ energiya manbalariga o‘tish rejalashtirilgan.
Qaror loyihasiga muvofiq, ishlab chiqarish jarayonlarini modernizatsiya qilayotgan, tozalash inshootlari hamda avtomatik havo monitoringi tizimlarini joriy etayotgan korxonalar moliyaviy imtiyozlar va grantlar orqali qo‘llab-quvvatlanadi. Mutaxassislarning fikricha, ushbu choralar amalga oshirilsa, poytaxt va viloyatdagi havo sifati sezilarli darajada yaxshilanadi.
Bu esa nafaqat ekologik xavfsizlikni oshiradi, balki aholiga sog‘lom va qulay yashash muhitini yaratishda muhim ahamiyatga ega bo‘ladi. Shu bilan birga, ekologik talablarni kuchaytirish O‘zbekistonning “yashil iqtisodiyot”ga o‘tish strategiyasida muhim qadam sifatida baholanmoqda (manba: Ekologiya vazirligi).
