Toshkentda issiq suv va issiqlik tariflari oshiriladi
Toshkent shahrida issiq suv va issiqlik xizmatlari uchun tariflar 15 foizga oshiriladi. Bu haqda Zamin.uz xabar berdi.
Bu haqida Veolia Energy Tashkent kompaniyasi ma’lum qildi. Poytaxt hokimining qaroriga binoan, markazlashgan issiqlik ta’minoti xizmatlariga yangi tariflar tasdiqlandi.
Yangi tariflarga ko‘ra, bazaviy narx QQSsiz 711 641 so‘m/Gkalni tashkil etadi. Aholi uchun tarif 139 860 so‘m, budjet tashkilotlari uchun 952 797 so‘m, boshqa yirik iste’molchilar uchun esa 342 296 so‘m etib belgilangan.
Hozirda poytaxt aholisi bazaviy tarifning atigi 18 foizini to‘laydi, qolgan qismi shahar budjeti subsidiyalari hisobidan qoplanmoqda. Hukumat esa 2030 yilgacha ushbu subsidiyalarni bosqichma-bosqich bekor qilishni rejalashtirmoqda.
Veolia Energy Tashkent kompaniyasi kelgusi besh yil davomida issiqlik xizmatlari bo‘yicha to‘lovlarni to‘liq iste’molchilar zimmasiga o‘tkazishni maqsad qilgan. Shuningdek, kompaniya 2025 yilda gaz va elektr energiyasi tariflarini 1 maydan, isitish manbalari uchun esa 15 iyundan oshirishni rejalashtirmoqda.
Yangi qaror rasman e’lon qilingan kundan boshlab kuchga kiradi. Manba: zamin.uz
